Ezinye izisebenzi zikahulumende zithi zizaqala ukukhalala umsebenzi namuhla zikhonona ngeholo eliphansi njalo zigqugquzela ukuthi zihlawulwe ngedola lakweleMelika.
Izisebenzi lezi zigoqela ezempilakahle, ababalisi kanye lezezinye ingatsha ezitshiyeneyo. Izisebenzi zamabhanga athile lazo zithi kazisenelisi ukuqhubeka zisiya emsebenzini.
Ukukhalala umsebenzi lokhu kuza ngesikhathi uhulumende elungiselela ukuhlangana lenkokheli emela izisebenzi kuliviki bekhulumisana ngeholo phansi komthunzi weTripatite Negotiating Forum.
Kuza njalo ngesikhathi uhulumende esanda chothozwa yiMelika lenhlanganiso yeInternational Labor Organization (ILO) phezu kokuhlukuluza abakhokheli benhlanganiso zezisebenzi.
Sikhuluma nje abanye babakhokheli beZCTU ababalisa uMnu Japhet Moyo loMnu Peter Mutasa bazamiswa emthethwandaba namuhla besetheswa icala lokuqoqa umvukela.
Umkhokheli wenhlanganiso yababalisi bemaphandleni eyeARTUZ uMnu Obert Masarawuke laye uzamiswa enkantolo namuhla esetheswa icala lokwephula imigoqo ayifakelwa yinkundla kwelinye njalo icala.
Sixoxe lonobhala jikelele weZCTU uMnu Japhet Moyo waqala ngokuchasisa ngomhlangano wabo lohulumende ozayo kuliviki.
