Kulowesilisa odabuka eZimbabwe ohlukuluzwe kakubi ngamapholisa aseMelika, eWashington DC, njalo ambopha ngoMgqibelo emethesa icala lokuzama ukulwisana lawo.
UMnu Tapiwa Musonza ubikwa ebengenele kudaba lokubotshwa kwabanye abasakhulayo ngamapholisa angabantu abamhlophe, ezama ukuwachasisela ukuthi abasakhulayo labo bebengenzanga lutho olubi.
Lokho kwacunula amapholisa lawa aseqala ukumhlukuluza amthela izankosi lomlilo gagetsi emzimbeni (taser).
UMusonza, yena oleminyaka yokuzalwa engu29 uqede amalanga amabili evalelwe esitokisini kodwa ukhululwe izolo ngemva kokuba abatshutshisi beyalile ukumethesa icala, ngokutsho kwegqwetha lakhe.
Udaba lolu lucunule kakulu uzulu waseMelika, ikakhulu abantu abamnyama kanye lozulu weZimbabwe ohlala eMelika ngitsho lasekhaya.
Ukuhlukuluzwa lokubulawa kwabantu abansundu ngamapholisa amhlophe yinto evamileyo ehlala isenzeka njalo nje kweleMelika.
Ukuhlaziya udaba lolu sixhume isizalwane seZimbabwe esihlala eMelika uMnu Kelvin Manduna yena othi abantu abamnyama bahlalela evalweni kulelilizwe.
