Sokuqhamuke ukukhonona okukhulu phezu komthetho owethulwe yiReserve Bank of Zimbabwe izolo othi inhlanganiso ezizimeleyo lamankampani agcine imali yakwamanye amazwe emabhanga kasavunyelwa ukuyithatha injalo ingeyakwamange amazwe.
Umthetho lo uthi imali le kumele isetshenziswe kuphela injalo nxa kukhona abakuhlawulelayo phandle kwelizwe.
Kodwa nxa befuna ukuyisebenzisa eZimbabwe kumele bayintshintshe ebhanga abayigcine kulo ibe ngeyeZimbabwe.
Lokhu kutsho ukuthi inhlanganiso kumbe amankampani abebhadala izisebenzi ngedola leMelika sokumele azihlawule ngemali yeZimbabwe, okuyinto esolwa ngabanye.
Kodwa iReserve Bank ithi abantu nje (individuals) abagcine imali yakwamanye amazwe emabhanga kabasoze baphathwe yilumthetho.
Ithi njalo abamukela imali abayithunyelwa ngabangane kumbe izihlobo ezikwamanye amazwe bazaqhubeka beyithola injalo.
Isizalwane seZimbabwe esihlala eMelika uMnu Garry Thwala Jackson utshele iStudio 7 ukuthi kavumalani lenyathelo leli.
