Ibandla leZanu PF selesithesa ibandla leMDC icala lokufuna ukuvusa impi elizweni kulandela amazwi esiphathamandla sebandla, uMnu. Job Sikhala owathi bazasusa uMnangagwa ukhetho luka 2023 lungakafiki.
Isikhulumeli sebandla leZanu PF, uMnu. Simon Khaya Moyo uthe usikhala lomkhokheli weMDC, uMnu. Nelson Chamisa sebekhulume amazwi atshengisa ukuthi bafuna impi.
UMoyo uthe iMDC ingalibali ukuthi ibandla leZanu PF laya empini lalwela ilizwe ngakho lilibandla lomzabalazo.
USikhala owathi ibandla leMDC lizagenqula uhulumende ukhetho luka 2023 lungakafiki ukhangelelwe ukuyazibika emapholiseni namhla.
Kunjalo nje, Inengi lithi lilokhu lithwele amagabha avuzayo ngokukhuphuka kwentengo yempahla, ukusilela kwamafutha ezimota okuhambisa, amanzi, kanye lamagetsi, khona osokufike ezingeni elibi.
Ukuzwa okunengi ngaloludaba, sixoxe loMnu. Edwin Ndlovu, ilunga lebandla leMDC, yena okhulume ezimele.
UMnu. Ndlovu, uqala ngokuchasisela uSithandekile Mhlanga weStudio 7 ukuthi kungani inengi lingaxhasanga ibandla leZanu PF ukutshengisela izolo edolobheni lakoBulawayo, lisola ukukhuphuka kwentengo yempahla lanxa kuluhlupho oluthinta umuntu wonke.
