Umsekeli kamgcinisihlalo webandla leMDC uMnu Job Sikhala uzamiswa emthethwandaba namuhla esetheswa icala lokutshotshozela ukugenqulwa kukahulumende kaMongameli Emmerson Mnangagwa.
UMnu Sikhala ubotshwe ngoLwesibili phezu kwamazwi awethule ngempelaviki emhlanganweni we Bikita awokuthi bazagenqula uMnangagwa embusweni ukhetho luka2023 lungakafiki.
Kodwa uSikhala yena ubikwa esithi wayesithi bazagenqula indubo eziselizweni hatshi uMnangagwa.
Ukubotsha kukaSikhala kwenza inani lasebebotshelwe icala elifanayo lonyaka lifike kumatshumi amabili lanye.
Banengi abathi bayasekela uSikhala kulandela umbiko womsekeli wesikhulumeli sebandla, uMnu. Luke Tamborinyoka othi ibandla kalilani lamazwi ka Sikhala ngoba uzezikhulumela ezimele.
Isikhulumeli seMDC uMnu Fortune Daniel Molokela utshele uNtungamili Nkomo weStudio 7 ukuthi ubunengi babantu asebebotshelwe icala leli kuveza ukuthi uMnangagwa ungumbusi omubi ukwedlula uMnu Robert Mugabe.
"Inani leli liyamangalisa elokuthi lo umnyaka lokhu uqalile ngoZibandlela sokulabantu abangamatshumi amabili lanye asebebotshiwe. Kwakungenzakali konke lokhu ngesikhathi sombuso ka Mugabe," kutsho uMolokele.
Uthi kutshengisela ukuthi lokhu kwenzkala ukutshengisela ngoZibandlela uhulumende elokhu esesaba.
"Thina njengenkokheli yebandla siyavumelana ukuthi kumele sisebenze ndawonye ukuthi silethe inguquko eZimbabwe," kutsho uMolokele.
