Izakhamizi zakoBulawayo ezichothoza umsekeli kaMayor walelidolobho uMnu Tinashe Kambarami zithi sezimelele isinqumo senkantolo ngamehlo abomvu kudaba lokuthi uKambarami wayengamelanga abe ngukhansila ngoba wake wafunyanwa ngumthethwandaba elecala njalo wagwetshwa.
Inhlanganiso ye1893 Mthwakazi Restoration Movement yiyo eyamangalela uKambarami, yena omiswe emthethwandaba phezu kwaloludaba izolo.
Kulezakhamizi ezitshengisele ngeviki edluleyo zisola uKambarami ngokuzama ukuxotsha umsebenzi umabhalane wekhansili yakoBulawayo uMnu Christopher Dube esithi uphatheka emisebenzini yenkohlakalo.
Izakhamizi lezi zenze okufanayo njalo izolo phandle komthethwandaba ngesikhathi kuhluzwa udaba lukakambarami lolu. Umantshi uthe uzakwethula isinqumo sakhe ngoLwesine.
Isiphathamandla seMthwakazi Republic Party, uMnu Mbonisi Gumbo, ongomunye wabantu abatshengiseleyo izolo uchasisela uSithandekile Mhlanga weStudio 7 okunengi ngensolo yebandla lakhe.
Ukuhlaziya udaba lolu sixhume isizalwane seZimbabwe esihlala eMelika uMnu Garry Thwala Jackson.