Uzulu weMelika uqhinqa isililo kulandela ukudutshulwa lokufa kwabantu abangamatshumi amabili lasitshiyagalolunye (29) kuzehlakalo ezimbili ngempelaviki amalanga elandelana.
Isehlakalo sakuqala senzakale ngoMgqibelo edolobheni leEl Paso, eTexas lapho owesilisa omhlophe angene khona esitolo sakoWalmart waqala ukudubula abantu mahlayana nje.
Umadubula ubotshiwe njalo amapholisa athi ungumuntu ozonda abantu bokuza, ikakhulu abavela kweleMexico. Athi njalo injongo yakhe ibivele ingeyokubulala abantu laba.
Isehlakalo sesibili senzakalele esabelweni seOhio, edolobheni leDayton lapho okulowesilisa njalo omhlophe odubule abantu ekade bezilibazisa nje egcekeni, okugoqela udadewabo.
Amapholisa athi asacwayisisa ukuthi umsolwa ubejongeni kahle-kahle, lanxa nje emdubulile laye wafa.
Izehlakalo zombili sezilethe ukufuthelana okukhulu eMelika phakathi kwabathi imithetho ephathelane lokuthengiswa kwemibhobho kumele iqiniswe lalabo abaphikisa lumbono.
Isizalwane seZimbabwe esihlala eOhio, uMnu Timothy Muringayi utshele iStudio 7 ukuthi bahlalele evalweni ngemva kwesehlakalo lesi.
