Ukunqoba kweZanu PF kukhetho lokudinga umeli weLupane East edale lephalemende lamakhansila amabili eNkayi laseBubi ngoMgqibelo kwephule abamabandla aphikisayo inhliziyo ngoba bebecabangela ukuthi ukonakala komnotho kuzabangela ukuthi abavotayo bahlamukele ibandla elibusayo.
UMnu Mbongeni Dube oweZanu PF unqobe uMnu Dalumuzi Khumalo labanye ngesilinganiso esikhulu. UDube uthole amavoti angu6, 369 kwathi uKhumalo wathola angu4, 505.
Amanye amabandla amancane afana leleMDC-T, oMthwakazi laboZapu wona athole okungamavotinyana okungatsho lutho.
Lanxa uDube etshele iStudio 7 izolo ukuthi uyathokoza kakhulu ngalimpumela, abeMDC bathi kube lokuqilibezela.
Ukuhlaziya loludaba sixoxe olwela amalungelo oluntu uMnu Difa Dube saqala ngokumbuza ukuthi kuyini okungaba kwenze abantu beLupane bavotela iZanu PF yona isetheswa icala lokudiliza umnotho welizwe.
