amalinks wokungena

Breaking News

Amazwe Athuthukileyo Kuhulumende weZimbabwe: Tshiyana Lokuhlukuluza Abantu


Amazwe angentshonalanga agoqela aweEuropean Union, iMelika leBhilithani ethule umbiko ngoLwesibili esola uhulumnde weZanu PF ngokutshaya lokuhlukuluza abantu abazame ukuphatheka kuhlelo lokutshengisela obeluqoqwe yiMDC eHarare ngeviki edluleyo.

Amazwe la athi uhulumende kumele ahloniphe amalungelo oluntu njalo avumele abantu nxa belesifiso sokutshengisela ezitaladeni ngokuthula ngoba isisekelo sombuso welizwe sibavumela.

Abameli bamazwe la bathi uhulumende kaMongameli Emmerson Mnangagwa kumele atshiyane lokuhlukuluza abantu esebenzisa amabutho lamapholisa.

Amanye amazwe ayingxenye yalumbiko ngaphandle kweMelika leBhilithani, abalisa iFrance, iGermany, iGreece, Netherlands, Romania, Sweden, Australia leCanada.

Umbiko lo uza ngemva kokubotshwa kwabantu abafika phose ikhulu ngoLwesihlanu eHarare ngesikhathi bezama ukungena ezitaladeni betshengisela phezu kokwehluleka kukahulumende ukulungisisa umnotho.

Kuza njalo ngesikhathi abasekeli beMDC koBulawayo behlukuluzwa ngabantu abanakanelwa ukuthi ngamasotsha kumbe amaCIO abahlome ngamaAK 47, bebathumba njalo bebatshaya ebusuku.

Abatshayiweyo bagoqela umsekeli kaMayor wakoBulawayo uMnu Tinashe Kambarami yena othunjwe ngoMgqibelo wabhaxabulwa waze wagelwa lenwele ngembodlela.

Kuthunjwe njalo uMnu Masiza Ndlovu, oyisiphathamandla salelibandla laye watshaywa kakubi, ngokutsho kwesikhulumeli seMDC koBulawayo uMnu Swithern Chiroodza.

Amazwe angentshonalanga la aphinde achothoza uhulumende ngokuqhubeka ehlukuluza abalwela amalungelo ezisebenzi abafana labeZCTU.

Iziphathamanda zalinhlanganiso ezigoqela uMnu Peter Mutasa loMnu Japhet Moyo bathi sebehlalela evalweni ngemva kokuthunyelwa imibiko yokubethusela ngokufa kubomakhalekhukhwini babo.

UMnu Moyo utshele iStudio 7 ukuthi umdeni wakhe awuselakho ukuhlaliseka.

please wait

No media source currently available

0:00 0:02:28 0:00

Lanxa sehlulekile ukukhuluma lamapholisa, isikhulumeli sikahulumende uMnu Nick Mangwana uthi kabasoze bavumele abantu besenza udlakela elizweni.

Ilunga leZanu PF uMnu Joseph Tshuma yena uyakulandula ukuthi abathumba lokutshaya abantu laba ngabomvikela kuhulumende.

XS
SM
MD
LG