amalinks wokungena

Breaking News

UMphoko Ubotshiwe Ngecala Lenkohlakalo Wakhululwa ngeBail, Uzaphindela Enkantolo Ngenyanga Ezayo


Owake waba ngumsekeli kaMongameli weZimbabwe uMnu Phelekezela Mphoko, yena obotshwe ngamapholisa ngoLwesithathu phezu kwecala lenkohlakalo.
Owake waba ngumsekeli kaMongameli weZimbabwe uMnu Phelekezela Mphoko, yena obotshwe ngamapholisa ngoLwesithathu phezu kwecala lenkohlakalo.

Owake waba ngumsekeli kaMongameli weZimbabwe uMnu Phelekezela Mphoko ubotshiwe wamiswa emthethwandaba ngoLwesithathu esetheswa icala lenkohlakalo.

UMphoko ubeselensuku ezithile esala ukuya emapholiseni lakuZimbabwe Anti-Corruption Commission esithi uhulumende uzama ukumbulala ngokumhlaba ijekiseni eletshefu.

UMnu Mphoko umiswe emthethwandaba kamantshi koBulawayo esetheswa icala lokusebenzisa ihofisi yakhe ngendlela engayisiyo ngokulaya amapholisa ukuthi akhulule owayengumqondisi wogatsha lweZimbabwe National Roads Administration (ZINARA) uMnu Moses Julias Juma ngo2016.

Umantshi uMnu Enias Magate uhlawulise uMphoko imali yesibambiso, i-bail, efika kunkulungwane eyodwa yamadola, i$1000 ukuze athonisiswe ephandle.

Umlaye njalo ukuthi kumele aziveze eCentral Police Station ngoLwesihlanu viki ngeviki njalo aphe abatshutshisi i-passport yakhe.

UMnu Mphoko uxwayiswe njalo ukuthi angalokothi azame ukukhulumisana kumbe ukwethusela abafakazi kuloludaba.

Lanxa emiswe enkantolo yakoBulawayo, udaba lwakhe luzathethwa ngumthethwandaba kamantshi eHarare lapho azamiswa khona mhlaka 4 ngenyanga ezayo.

Umtshutshisi, uMnu Thomson Hove utshele umthethwandaba ukuthi uMphoko - yena oleminyaka yokuzalwa engamatshumi ayisikhombisa lasificamunwemunye, 79 - wadala icala leli ngesikhathi esasengumsekeli kaMongameli Robert Mugabe.

Uthe phakathi kukamhlaka 13 kusiya ku14 Ntulikazi ngomnyaka ka2016 uMphoko wahamba eAvondale Police Station eHarare wasebenzisa amandla akhe ukuba amapholisa akhulule uJuma lomunye ayebotshwe laye uDavison Norupiri. Ababili laba babebotshwe yiZimbabwe Anti-Corruption Commission.

Ngokwenza njalo, umtshutshisi uthe uMphoko wephula isahluko 106 sesisekelo sombuso welizwe, i-constitution. Kodwa uMphoko uyalilandula lelicala.

''Sesivela eCourt, uBaba uMphoko uphiwe i-bail ukuthi abhadale i$1,000; aye emapholiseni kanye ngeviki njalo aphe abatshutshisi ipassport yakhe,” kutsho igqwetha likaMphoko uMnu Zibusizo Ncube.

Kolunye udaba olwehlukileyo, uzulu wakoBulawayo sesole kakhulu amapholisa ngokuqhubeka ezula ngedolobho leli ehlomile.

Amapholisa la aqale ukubhodabhoda ngempelaviki ngenjongo yokuvimba ukutshengisela okwakuqoqwa yiMDC ekhokhelwa nguMnu Nelson Chamisa ngoMvulo.

''Yinto engalunganga ngoba yindlela yokuzama ukwethusela abantu. Uhulumende kazame ukuwakhupha masinya amapholisa,” kutsho isakhamuzi uMnu Mhlaba Sibanda.

Amazwi kaSibanda agcizelelwe ngesinye njalo isakhamuzi uMnu Shooter Ngwenya.

''Isifiso sethu yikuthi amapholisa abuyele endaweni zawo ayelondoloza ukuthula,'' kutsho uNgwenya exoxa lestudio 7.

Ibandla leMDC lisola uhulumende lisithi amalunga alo, ikakhulu koBulawayo asethunjwa mihla ngemihla ngabantu abahlomileyo bewatshaya lokuwahlukuluza.

please wait

No media source currently available

0:00 0:04:08 0:00
XS
SM
MD
LG