Umqoqi wenhlelo zeMDC uMnu Amos Chibaya ubotshiwe ngoLwesine esetheswa icala lokwehluleka ukumisa ukutshengisela okwakuqoqwe libandla lakhe eHarare ngeviki edluleyo.
Kodwa iMDC ithi lokhu kuyamangalisa ngoba ukutshengisela kwayo lokhu akusabanga khona ngemva kokwalelwa kwayo ngamapholisa.
Iphathamandla salelibandla uMnu Gift Siziba utshele iStudio 7 ukuthi ukubotshwa kukaChibaya lokhu kuveza sobala ukuzimisela kukahulumende ukuqhubeka ehlukuluza amalunga eMDC.
Zinengi iziphathamandla zeMDC esezibotshiwe phakathi kwamaviki ambalwa edluleyo, ezigoqela yena uSiziba, uMnu Job Sikhala labanye.
Umgcinisihlalo weMDC uNkosazana Thabitha Khumalo laye uke wabotshwa ndawonye labanye abayisikhombisa ngoMgqibelo koBulawayo besetheswa icala lokuqamba amanga ngokuthi kwaba lokuqilibezela kukhetho luka2018.
