Inkokheli yakwamanye amazwe ekhulume emfeni kaMnu Robert Mugabe ngoMgqibelo ichaze uMugabe njengeqhawe elaphatha indima enkulu ekukhululeni lekuthuthukiseni abantu baseAfrica.
“UMugabe wayeqakathekisa iziloyiso zezwekazi leAfrica ngaso sonke isikhathi. Wayelwela ukuthi inotho yeAfrica ithuthukise abantu bayo,” kutsho uMongameli wakweleKenya uMnu Uhuru Kenyatta ekhuluma emkhosini oqhutshelwe eNational Sports Stadium.
“Lanxa bekhona ababemnyonkoloza, empilweni yakhe yonke wasebenza kuhle lenye inkokheli yeAfrica njalo esethekelela amazwe atshiyeneyo. Ngikhuthaza abantu baseAfrica ukuthi bame ndawonye bangavumi ukwehlukaniswa.”
UMongameli Kenyatta wengeze wathi uMugabe wayengumkhokheli ocije ngomqondo njalo owayefuna ukubona inzalo yeAfrica ibambene.
Amazwi akhe agcizelelwe nguMongameli wakweleSouth Africa uMnu Cyril Ramaphosa yena ohozwe nguzulu phezu kokuhlaselwa lokubulawa kwabokuza elizweni lakhe.
Kodwa uphange waxolisa.
“Ngima phambi kwenu njengomunye wenu, njengesizalwane saseAfrica. Ngilusizi njalo ngiyaxolisa kakhulu ngokwenzakalayo elizweni lami,” kutsho uMongameli Ramaphosa.
Lanxa ababili laba become uMugabe, ingcwethi kwezombusazwe uMnu Dinizulu Macaphulana uthe umufi wayengumbusi omubi ofe elegazi labantu abanengi ezandleni zakhe.
