amalinks wokungena

Breaking News

Uzulu weZimbabwe Ukhuthazwa Ukuphatheka Ekudingeni Amacebo Okuxazulula Inhlupho Ezibhekane Lelizwe


Umhlangano oweNational Citizen Convention
Umhlangano oweNational Citizen Convention

Uzulu weZimbabwe ukhuthazwa ukuphatheka kunhlelo zokuxazulula indubeko ilizwe elibhekane lazo ukuze kuphunywe lamacebo lenhlelo zokuqeda lezindubo.

Lokhu kuphume emhlanganweni wezakhamizi oweNational Citizen Convention, eHarare ongenwe ngabenhlanganiso ezimela uzulu abavele kunhlangothi ezitshiyeneyo zempilo.

Lumhlangano oqoqwe ngabenhlanganiso yezakhamizi eye Citizens Manifesto ubuthanise abenhlanganiso ezitshiyeneyo bebexoxisana ngendlela zokuqeda inhlupho ilizwe elibhekane lazo.

Umkhokheli wenhlanganiso ye Tajamuka/Sesijikile uMnu. Promise Mkhwananzi ucasisa ngokuqakatheka kokuphatheka kwezakhamizi kunhlelo zokwakha ilizwe.

“Thina sibona kungani kuqakathekile ukuthi sibuthanise izakhamizi ngoba izakhamizi yizo abanikazi beZimbabwe so sizama ukuthi sibuthanise izakhamizi sixoxisane ngodubo olukhangelane lelizwe sibonisane njalo ukuthi singaqubekela phambili njani silwela amalungelo oluntu kanye lenotho ukuthi singayilungisisa njani”

Lokhu kugcizelelwe ngunobhala jikelele wentsha yebandla le MDC umnumzana Ostallos Siziba.

“Okuqakathekileyo yikuthi ngasikhathi zonke emhlabeni wonke jikelele kungakabi lenguquko okwenzakalayo yikuthi abantu abavela kunhlangothi ezitshiyeneyo bayahlangana bonke ukuze babonisane mayelana lento ezimbili engibona angani yizo ezizasicebisa ngendlela esizahamba ngayo. Okwakuqala yikubana inhlupho esilazo yiziphi njalo zihlangana phakathi zibe yini, okuyikho okuhlukuluza umuntu othengiseyo, okuhlukuluza umfundi kanye lomuntu wonke”

Umhlangano lo uqhutshwa ngesikhathi izisebenzi zikahulumende zikhonona ngeholo lazo elingeseneli loba indleko yokuya emsebenzini. Okugcizelelwe ngunobhala jikelele wenhlanganiso yababalisi bemaphandleni, eye Amalgamated Rural Teachers Union of Zimbabwe (ARTUZ), umnumzana Robson Chere.

“Ngifuna ukuthola impendulo evela kuzakhamizi ngoba kulezakhamizi ezivela kunhlangothi ezitshiyeneyo eziqoqela abokholo, izisebenzi lokunye okunjalo. Sizaxoxisana ngendaba ezitshiyeneyo ngoba okusibambanisayo yikuthi sonke sikhathazwa zindubeko ezikhona elizweni njalo kumele sixazulule indlela zokuthi siqede lezo ndubeko”

Umkhokheli wenhlanganiso yezifundi zemakholitshini eye Zimbabwe National Students Union (ZINASU) uArchibuld Madida uthi ukuqonga kwentengo yempahla elizweni sokubathwalise nzima njengezifundi.

“Njengabafundi sibona angani impilo yethu iphakathi kwengozi, lapho esihlala khona akumanga kuhle. Thina siyintsha esisenelisi ukuthenga loba yini ngakho ke impilo zethu zisengozini. Uhulumende lo eseyehlulekile ukunikeza usizo.”

Umhlangano lo, oqoqwe ngabenhlanganiso eye Citizens Manifesto, ubuthanise abatsha labasakhulayo abavele enhlanganisweni ezitsheyeneyo.

please wait

No media source currently available

0:00 0:03:05 0:00
XS
SM
MD
LG