Umthethwandaba kamantshi koBulawayo ngoLwesihlanu ulahle icala ebelisetheswa umgcinisihlalo weMDC uNkosazana Thabitha Khumalo lamanye amalunga alelibandla ayisithupha usithi uhulumende kalandelanga umthetho ekutshutshiseni loludaba.
UNkosazana Khumalo labanye bakhe babotshwe ngoNcwabakazi betheswa icala lokudinda amanga okuthi uMongameli Emmerson Mnangagwa waqilibezela kukhetho olwedluleyo.
Kodwa umantshi uMnu Tinashe Tashaya ulahle lelicala wavumelana legqwetha labasolwa ukuthi umtshutshisi waletha loludaba emthethwandaba engalandelanga umthetho.
Kodwa uTashaya uthe nxa uhulumende elesifiso sokuqhubeka ngaloludaba, kumele alukhweze enkantolo kakutsha ngendlela esemthethweni.
“Kuthwe sebengazihambela ngekhaya. Abasaphiwa amalanga okuthi 'buyani emthethwandaba ngelanga elithize.' Nxa idale lifuna ukuqhubeka, selizathumela amasamanisi,” kutsho igqwetha likaMaKhumalo labanye bakhe uMnu Godfrey Nyoni ekhuluma leStudio 7.
