Umthethwandaba kamantshi ngoLwesibili ulaye uhulumende ukuthi kumele aphenye udaba lokufa kukaMnu Hilton Tamangani njalo aze lempumela yaloluphenyu umhlaka 5 wenyanga ezayo ungakedluli.
UTamangani ufele ejele ngoLwesihlanu lweviki edluleyo ngemva kokutshaywa ngamapholisa ekubotshweni kwakhe labanye abaphila ngokuthengisa ezitaladeni abalitshumi besetheswa icala wokutshaya ipholisa.
Amagqwetha kaTamangani athi igazi lakhe lisezandleni zikahulumende ngoba ecele ukuthi ayekwelatshwa esibhedlela esizimeleyo kodwa uhulumende wakwala lokhu.
Abanye abalitshumi ababotshwe lomufi bakhululwe ngoMvulo ngemali yesibambiso.
Abasekeli beMDC abathathu ababotshwe ngoMvulo ababalisa uMnu Denford Ngadziore, uMnu Makomborero Haruzivishe loMnu John Matoratora besethesa icala lobudlwangudlwangu, labo bakhululwe ngumthethwandaba ngoLwesibili ngemali yesibambiso, ibail, engamakhulu amabili umuntu ngomunye.