Izakhamizi zemaphandleni zithi ziphakathi kwendlala emangalisayo phansi kombuso kaMongameli Emmerson Mnangagwa. Inengi lithi impilo isuke yabanzima kakhulu kuminyaka emibili edlulileyo kulandela ukukhitshwa esihlalweni kwayengumongameli, umuyi uMnu Robert Mugabe.
Inengi lezakhamizi zemaphandleni likhala ezimathonsi ngombuso kaMongamele Mnangagwa lisithi selibhekane lendubo ezinengi ezibalisa indlala, ukuqonga kwentengo yempahla mahlayana kanye lokusilela kwemithi ezibhedlela.
Izakhamzizi esixoxe lazo ziveze ukuzisola ngokusekela ukukhitshwa kwayenguMongameli welizwe, umuyi uMnu. Robert Mugabe zisithi sezikubona lamhla ukuthi wayengcono kulalo okhona.
UNkosikazi Maggie Moyo, isakhamuzi seMawane phansi kwenduna uNhlamba uthi bathwele amagabha avuzayo phansi kombuso kaMongameli Mnangagwa.
“UMugabe kade engcono kulalo ubaba ongenileyo iqiniso lihle lojehova uyabona, lokhu ukuthi izinto ziyaqansa ziyephezulu, amabhasi kasagadeki abantu bakhala izinyembezi kuMugabe kade kungekho konke lokhu ngitsho ubesinceda umdala lowana futhi sithe sisiza kuthiwa kasekho ngezwa ngiphela yonke umuntu lamhla kade esithi umugabe ebenceda hatshi lokhu esiyikho khona siphakathi kwenkangala emangalisayo,” kutsho uMoyo.
UMnu. Dennis Moyo isakhamuzi seNyandeni phansi kweNduna uMasuku uthi uMongameli Mnangagwa wehlulekile ukugcina izithembiso azenzayo lapho ehluthuna umbuso kuminyaka emibili edluleyo.
“Ngokunanzelela kwami abantu beZimbabwe bahlezi phezulu kwameva, intengo yezinto ikhwela nsukuzonke ,imithi ezibhedlela ayitholakali sekuze kudlula khonokhuyana okuka 2008, ngiyananzelela inkulumo ayikhuluma eqala ukuhluthunela uMugabe umbuso esithi izinto ziyabe sezilungile ngemva kwe 100 days kodwa manje into seziworse akuselamahluko umuntu osebenzayo longasebenziyo ,ofundileyo longafundanga sekufana nje sekusenkangala izimbabwe siwome qha,” kutsho uMoyo.
UNkosikazi Trainer Ndlovu owe Sizhubane phansi kweNduna uMathe uthi babhekane lendlala embi kakhulu kuminyaka emibili eyedlulileyo.
“Iminyaka le emibili edluleyo kade siphakathi kwengala kade kulendlala kakhulu ngoba size saphiwa ukudla lakathesi lokhu sihola ukudla ngenxa yokuthi kade sisenkangala sesikhangelele ukuthi laye unkulunkulu asinisele izulu elilingeneyo ukuthi silime sivune,” kutsho uNdlovu.
UMnu Brighton Nare oweNtalale yena uthi impilo yezakhamizi zemaphamdleni sinzima okumangalisayo selokhu uMugabe wasuswa esihlalweni.
“Vele njengathi emaphandleni asikaluboni utshintsho lwakhona otherwise sokungani sekuworse sekukubi kakhulu yikho abanengi sebesithi kuloMugabe kwakungcono ngoba isinkwa besiyi 90c kathesi isinkwa sesiyi $15, kufana lesikepe nxa sesingena amanzi lokhu sicwila sihamba ,ukubusa kukaMnangagwa lokhu wangenayo akulalutho njengathi emaphandleni vele souk worse ngangomunye umuntu ozwisisayo nga uyayekela nje,” kutsho uNare..
Amazwi akhe agcizelelwe ngesinye njalo isakhamuzi seMawane uMnu Gabriel Moyo othi akulanto enhle emakhaya.
“Akulanto eguqukileyo emakhaya lapha kathesi emakhaya worse lokhu undoda lowu engenile esihlalweni akulanto enhle into zonke zimbi kakhulu ngoba into ziyakhwela akusathengeki njalo imota kazigadeki and khona kusiya lezulu lalo alini konke asisakwazi ukuthi kanti vele kubonani ngesikhati sikaMugabe kwakungcono ngoba wayesenza ekhuza manje lo uthule zwi vele kakhuzi lutho ngumuntu ophonguzithulela,” kutsho uMoyo.
Inengi labantu lajabula kakhulu elizweni lonke jikelele lapho kususwa uMugabe esihlalweni lilethemba lokuthi lizaphila impilo engcono ngemva kwalokhu kodwa kuze kube lalamhlanje uzulu ukhala njalonje ngohulumende kaMongameli Emmerson Mnangagwa ophethe esithi abantu kumele babekezele esalungisa.
