Ukukhalala umsebenzi kwabodokotela asebehlezi emsebenzini okwesikhathi eside (Senior Doctors) ezibhedlela zikahulumende okuqale ngoLwesibili sokutshiye abagulayo labagulelwayo eHarare bebhekane lobunzima obukhulu njalo bengasakwazi lokuthi benzeni.
Umsakazo weStudio 7 wethekelele eParirenyatwa Group of Hospitals laseHarare Hospital wathola abagulayo labagulelwayo abayingcosana bezulazula bezama ukuthola usizo kodwa kusobala ukuthi baphelelwe.
UMnu Nelson Madziwana obeze loyise ogulayo uthi utshelwe ukuba kumele ahlolwe ngodokotela abazingcwethi (specialist doctors), bona abaphakathi kokukhalala umsebenzi.
“Into kazimanga kuhle lapha ezibhedlela ngoba odokotela kabekho, ikakhulu labo abathiwa ngama-specialist doctors,” kutsho uMnu Madziwana.
“Sesisuka lapha eParirenyatwa ukuya esibhedlela seBaines lapho esingathola khona usizo olungcono; akumanga kuhle lapha ezibhedlela.”
Kube ngesifanayo eHarare Central Hospital. UMnu Andrew Kambani ohlala elokitshini leEpworth, obeze lodadewabo kulesi sibhedlela uthe labo babuyeselwe emuva bengatholanga usizo.
“Ngile two asebefile ngokuswelakala kokuthi khona bencediswe nje. Asikhangeliseni sikhulume iqiniso ngoba lapha akusadingi ukuthi sikhulume into ezingayisizo ngoba sifuna ukuthabisa ubani, hatshi,” kutsho uKambani.
Inhlanganiso yeZimbabwe Senior Hospital Doctors ithi uhulumende kumele abuyisele odokotela bezinga laphansi (junior doctors) abedlula amakhulu amane abaxotshileyo phezu kokukhalala umsebenzi bekhala ngeholo eliphansi.
Ikhala njalo ngokusilela kwendingeko zezibhedlela ezifana lemitshina kanye lemithi, isithi uhulumende kumele akulungisise lokhu ngokuphangisa.
Umphathintambo wezempilakahle uMnu Obediah Moyo utshele intathelizindaba ukuthi akhona ama-senior doctors azaxotshwa lawo umsebenzi ngoba engaqhubi kuhle umsebenzi.
“Kulabodokotela bezinga laphezulu abangamatshumi amahlanu lasikhombisa okumele bajeziswe. Odokotela laba betheswa umlandu wokungazinikeli ngokwaneleyo emsebenzini wabo. Sebezothonisiswa ke kusikhatshana esilandelayo,” kutsho uMoyo.
