amalinks wokungena

Breaking News

UMnangagwa loChamisa Bafisela Uzulu weZimbabwe Ikhisimusi Enhle


UMnu Nelson Chamisa loMongameli Emmerson Mnangagwa

UMongameli Emmerson Mnangagwa lomkhokheli weMDC uMnu Nelson Chamisa ngoLwesibili bethule imibiko yokufisela uzulu weZimbabwe ikhefu lekhisimusi elihle lanxa nje besithi bayakwazi ukuthi inengi lithwele nzima ngenxa yokudilika komnotho.

Ikhefu lalonyaka liza ngesikhathi intengo yezinto ezitolo ilokhe ikhuphuka mahlayana njalo kulokusilela kwemali emabhanga, ukusilela kwamagetsi kanye lamafutha ezimota.

Abantu abangu7, 7 million emaphandleni lasemadolobheni labo bahlaselwe yindlala njalo badinga usizo lokudla oluphuthumayo.

Embikweni awethule enkundleni yeFacebook, uMnangagwa uthe uhulumende wakhe usebenza nzima ukuthuthukisa impilo kazulu lokuvuselela umnotho.

Uthe kunengi okwenziwa nguhulumende wakhe, okugoqela ukulwisana lenkohlakalo, ukuguqula ezombusazwe ngendlela ethakazelelwa nguzulu lokwakha iZimbabwe entsha.

“Ngiyakwazi ukuthi abanengi benu liyahlupheka. Ngiyalithembisa ukuthi sizaqhubeka siletha inguquko ezakwenza lezizukulwane zethu ziphile ngcono,” kutsho uMongameli Mnangagwa.

Amazwi akhe agcizelelwe lilunga leZanu PF uMnu Believe Gaule yena othi uMnangagwa ngumkhokheli oqotho okhuluma iqiniso lanxa lingambeki esimeni esihle.

please wait

No media source currently available

0:00 0:02:00 0:00

UMnu Chamisa yena ufisele uzulu ikhefu elilokuthula lokuthokoza esithi abantu kabamelanga balahle ithemba ngoba ibandla lakhe lizabahlenga ebunzimeni abaphakathi kwabo lingathatha intambo zombuso.

Uthi izithembiso zikaMnangagwa kuzulu kazilalo iqiniso njalo ngezokumkhohlisa nje.

Amazwi kaMnu Chamisa agcizelelwe yisikhulumeli sakhe uDr Nkululeko Sibanda, yena othe uzulu kumele aqhubeke esekela iMDC ukuze ingene embusweni.

“Inkululeko kayandanga ukuvela emuntwini oyedwa kodwa ivame ukuvela kuzulu. Abantu kumele basebenze ndawonye,” kutsho uDr. Sibanda.

please wait

No media source currently available

0:00 0:02:14 0:00

Facebook Forum

XS
SM
MD
LG