amalinks wokungena

Breaking News

Inengi Lithi Lehlulekile Ukunanza Ikhisimusi Ngenxa Yokonakala Komnotho


Uzulu weZimbabwe unanze ikhefu leKhisimusi ngoLwesithathu ekhala ngokutshabalala komnotho kanye lendlala ehlasele abantu abangu7, 7 million lizweni.

Abanengi abakhulume leStudio 7 koBulawayo bebezisebenzela bezama ukuphandela imuli zabo.

“Ngilapha e-market, ikhisimusi hayi angiyiboni ngenxa yokuthi ngicabangela abantwana i-school fees lapha esesibiza o$800. Ngakho, sizama ukuthi sithengise kodwa kunzima,” kutsho uMnu Thuba Ncube.

Umnotho welizwe usuleminyaka eminengi usadalala njalo uhulumende ukhanya engelawo amaqhinga okuwulungisisa.

Umfanyana oleminyaka yokuzalwa elitshumi lanhlanu njalo eyintandane uJohn Jele uthi ngenxa yokubhidlika komnotho, wehlulekile okwakuqala lonyaka ukuthengela ugogo wakhe impahla yeKhisimusi.

“Angiyidlalanga kuhle ngoba ugogo kenelisanga ukuthola imali yokungithengela impahla zeKhisimusi. Sidle khonokho okuncane esikutholileyo,” kutsho uJele.

“NgeKhisimusi bavame ukungithengela izigqoko lezicathulo engizithandayo. Kodwa lonyaka angitholanga lutho ngenxa yokoma komnotho.”

Omunye njalo esixoxe laye ngugogo uMagasela yena outshone endlini ethengisa iziwiji legwayi phambi kwendlu yakhe.

“Izinto zidule kakhulu sehluleka nje ukuthenga ulutho. Ngakho sizihlalele nje sizinathela amahewu lamanzi. Kulobunzima obukhulu kakhulu lonyaka,” kutsho uMagasela.

Ngaphandle kwendlala lokudula kwezinto, uzulu weZimbabwe ubhekane lokusilela kwamafutha ezimota, amagetsi lamanzi.

please wait

No media source currently available

0:00 0:02:58 0:00

XS
SM
MD
LG