EleBotswana selixwayise izihambi zakwamanye amazwe ukuthi alisoze lizivumele ukungena kulelolizwe nxa zilamaphasiphothi alamakhasi angcolileyo.
Lokhu kugoqela amaphasiphothi athelwe ngamanzi kumbe asecitshe amanye amabala ezidindo zokungena lokuphuma elizweni.
Isizalwne seZimbabwe esivinjwe emngceleni weRamokgwebana esingafunanga ukuqanjwa ngegama, sithi kuqakathekile ukuthi kube lezaziso ezaneleyo phezu kwaloludaba.
“Ngadlula mhlaka Mpalakazi 31 ngisiya ekhaya, kodwa abangitshelanga, lesi yisidindindo esitshengisa ukuthi ngadlula, mhlaka 31, ngabe bangitshela ngoba ngangileviki ngisekhaya. Mhlaka 14 Zibandlela sengingena, yikho abangalela khona,” kutsho ongathandanga ukuqanjwa lo.
Uqhubeke esithi ngelanga eyalelwa ngalo ukungena eBotswana, wayehamba lemuli yakhe, okugoqela ingane encane engaphansi kweminyaka emihlanu.
Esiye njalo isizalwane seZimbabwe uMnu Mthabisi Dube laye uthi kuqakathekile ukuthi eleZimbabwe leleBotswana azise izihambi ngokugcweleyo phezu kwaloludaba.
“Siyakuzwa ukuthi amaphasiphothi angcolileyo kawafunakali kodwa eleBotswana kanye leleZimbabwe kumele abone ukuthi izihambi ziyaziswa okugcweleyo ngodaba lolu, sesibone abantu bephendukiswa emngceleni phezu kodaba lolu,” kutsho uDube.
Kulesaziso emngceleni uma izihambi zingena kweleBotswana, kodwa izihambi zithi lokhu kubhalwe kuphetshana njalo abanye balakho ukusikhutha.
Isinqumo seBotswana sifika ngesikhathi kunzima ukuthola iphasiphothi entsha yeZimbabwe.
