UNkosikazi kaMnu Constantino Chiwenga uMarry Mubaiwa ubotshiwe wavalelwa ejele leChikurubi ngoMgqibelo esetheswa icala lokutshaya umlizane ogcina abantwabakhe.
UMubaiwa uvalelwe ngemva kokumiswa emthethwandaba phezu kwaleli cala. Umantshi walile ukuthi abuyele ngekhaya wathi kumele avalelwe ngoba ekhanya engumuntu olodlakela kakhulu.
Umamangala nguNkosazana Delight Munyoro yena othi uMubaiwa umtshayile ngoLwesibili olwedluleyo ngesikhathi elande abantwabakhe esikolo seHellenic, eBorrowdale.
Igqwetha likaMubaiwa, uNkosikazi Beatrice Mutetwa uphikisile phambi kwenkantolo ukuthi uMubaiwa watshaya umamangala kodwa lokhu akusizanga ngalutho.
UMubaiwa uke wabotshwa njalo ngoMpalakazi nyakenye esetheswa amacala enkohlakalo kanye lelokuzama ukubulala umyeni wakhe uChiwenga, ongumsekeli kaMongameli welizwe.
Ababili laba sebesehlukana. Udaba lokuchithwa komuzi wabo lusemthethwandaba njalo baphakathi kokubanga impahla lokuthi ngubani omele ahlale labantwana.