Uzulu weZimbabwe umanyene lamanye amazwe womhlaba ekunanzeni ilanga lokuqakathekisa umsebenzi wemisakazo ele World Radio Day.
Umphathintambo obona ngezokwethulwa kwemibiko uNkosikazi Monica Mutsvangwa ukhokhele umkhosi owenzelwe edolobheni leGweru lapho akhulume kabanzi ngomsebenzi wemisakazo.
Inengi lezizalwane zeZimbabwe zilalela indaba kumawayilesi lobanje kungasibo bonke abalalela imisakazo yaphakath kwelizwe ngoba ingekho ezimeleyo kumbe iyincosana eyezabelo eyamaCommunity Radio Stations, eyaphiwa imvumo yokusakaza. Abantu sebevame ukulalela indaba enkundleni ezitshiyeneyo zebulenjini ezifana laboFacebook, Twitter lezinye, kubomakhalekhukhwini.
UMqondisi weAmakhosikazi Women's Radio koBulawayo, uNkosikazi Sibusisiwe Bhebhe ukhuluma kabanzi ngelanga lezemisakazo ezweni.
''Thina njengeMakhosikazi Media sihlanganela lomhlaba sithakazelela ilanga lamagagasi sibonga lamathuba asethe aphiwa omama ukusakaza kumagagasi njalo eyindlela yokuba bazithuthukise. Siqhubekela phambili sikhankasela ukuba uhulumende weZimbabwe akhulule ezemisakazo kube lemisakazo yezabelo ukuze kubelentuthuko sisithi langa elihle lezemisakazo lokukhutshwakwemibiko eletha intuthuko.''
UMqondisi womsakazo weGetjenge, ePlumtree, uMnu Thomas Sithole uthi lokhe belinde ukuthola isichence sokusakaza ethi kubuyisela emuva inhlelo zentuthuko.
''Lokhu kwenza kubenzima ukuxhumana kwabantu kunhlelo zentuthuko silabantu abanengi abaphandle kwelizwe abaphatha ezentuthuko kodwa kungabalula uma bethintana emsakazweni ukuze kubelentuthuko esigabeni.''
UMsakazi weZimbabwwe, uMnu Mkhululi Ncube uthi ulusizi ngoba inengi labantu ezweni lokhebengenelisi ukulalela imisakazo kuzabelo zabo lona ilizwe selileminyaka engamatshumi amane yathola uzibuse.
''Lamhlanje kulilanga eliqakathekileyo kodwa uhlupho esilalo uma iqatanisa lamazwe angomakhelwane yikuba asilamisakazo efinyelela wonke umuntu, umzekeliso yiPlumtree, sekuleminyaka engamatshumi amane sathola uzibuse kodwa lokhebelalela imisakazo yakweleBostwana ngakho sikhangelele ukuba uhulumende akhulule imisakazo abantu abantu bonke balalele inhlelo zakuleli leziqhutshwa nguhulumende.''
UMsakazi weSkys Metro FM uNkosazana Patience Phiri uthi ukuqakatheka kwezemisakazo ngeke kwaphela.
'Umsakazo ngeke waphela amandla ngoba ufinyelela kuyoyonke indawo lalapho ezinye inkundla zendaba ezingafinyelelikhona kodwa udubo olukhona ezweni yikuba ayisibobonke ezweni abenelisa ukulalela inhlelo zakuleli njalo isifiso sami yikuthi isigaba lesigaba sibelomsakazo waso. Umzekeliso ludaba lodubo lwezikhukhula zamanzi ezibhekane labantu beBinga ngabe bebelomsakazo wabo bebezabakwazi ukuba kuzakuba lezulu lesikhukhula bayedinga usizo kusaselesikhathi kodwa akubanga njalo ngoba abala msakazo obungabazisa.''
Ekhuluma ngesikhathi kunanzwa ilanga lemisakazo eNkabazwe, umphathintambo wezokukhutshwa kwemibiko ezweni, uNkosikazi Monica Mustvangwa uchaze ukuba imisakazo iqakathekile ezweni lekuletheni intuthuko ngakhoke baphakathi kokuzama ukuba ezemisakazo ezweni zihambelane lezimiso zomhlaba lobanje kumele kwenziwe ngobuciko obukhulu.
Usuku olweWorld Radio Day linanzwa emhlabeni jikelele mhlaka 13 Nhlolanja minyaka yonke ngemva kokubekwa yinhlananiso yomanyano wamazwe womhlaba eyeUnited Nations Education Scientific and Cultural Organisation-UNESCO. Indikimba yokunanza ilanga leWorld Radio Day lonyaka ibigijima ngala amazwi athi ''Radio, Diversity and Development.
