UMongameli Emmerson Mnangagwa uzahlangana labameli benhlanganiso zeMatabeleland ezizimeleyo namuhla koBulawayo bekhulumisana ngendaba ezihlupha uzulu weMatabeleland ezigoqela udaba lweGukurahundi.
UMnangagwa ufike koBulawayo izolo njalo uzahlangana labenhlanganiso ezizimeleyo laba abaphansi komanyano abawubiza ngokuthi Matabeleland Collective, eState House.
Umanyano lo usanda dabuka phakathi. Ezinye inhlanganiso ziphume kuwo zisithi injongo yawo kayiziboni.
UMnangagwa uke wahlangana labantu laba njalo nyakenye koBulawayo.
Ugwalo oluhlela okuzakhulunywa emhlanganweni lo olubonwe yiStudio 7 luthi inhlanganiso lezi zizakwethulela uMnangagwa lokho ezithi kuvunyelwene nguzulu weMatabeleland phezu kokuthi kumele luphathwe njani udaba lweGukurahundi.
Kodwa abanye bathi akula kukhulumisana okuke kwenziwa zinhlanganiso lezi lozulu weMatabeleland phezu kwaloludaba.