Umeli weEuropen Union eZimbabwe uMnu Timo Olkkonen uthi umsekeli kaMongameli welizwe uMnu Constantino Chiwenga, labanye abathathu bazaqhubeka bekuluhlu lwezijeziso ezifakwe eceleni okwamanje andubana umanyano lo uze usuthiseke ukuthi sokube lenguquko kwezombusazwe lokuthi uhulumende weZanu PF usehlonipha amalungelo oluntu.
Umsakazo weStudio 7 ububike ngoMvulo ukuthi izijeziso lezi sezisusiwe. Kodwa lokhu akuqondanga.
UAmbassador Olkkonen uchasisele lumsakazo ngoLwesibili ukuthi inguquko esikhona kuphela kudaba lwezijeziso ngeyokuthi besule igama likaMnu Robert Mugabe ngoba sowabhubha njalo basusa umkakhe uGrace Mugabe kuluhlu lwezijeziso ebezisebenza bamfaka kuluhlu olubekwe eceleni okwamanje oluloChiwenga lomholi wamabutho uMnu Philip Valerio Sibanda kanye lowake waba kubutho kodwa osengumphathintambo wezokulima uMnu Perrence Shiri.
Abane laba lokhe bephansi kwezijeziso zeEU lanxa nje zibekwe eceleni.
Inkampani yamabutho eyeZimbabwe Defence Industries yona iphansi kwezijeziso ezisebenzayo njalo ayivunyelwa ukuthenga izikhali emazweni aseEurope.
“Ngokunjalo, sesilabantu abane abalokhe betheswe izijeziso yiEU kodwa zisabekwe eceleni lezo zijeziso,” kutsho uAmbassador Olkkonen.
Uphinde walandula imbiko kahulumende yokuthi izijeziso zeEuropean Union lezi yizo ezibulala umnotho weZimbabwe.
Umphathintambo obona ngobudlelwano beZimbabwe lamanye amazwe uMnu Sibusiso Moyo yena uthi lanxa bekunanzelela ukuthi iEU isiyekethisa, bafuna izijeziso lezi zesulwe zonke ngokugcweleyo.
Ukuhlaziya loludaba sixhume olwela amalungelo oluntu uMnu Mbuso Fuzwayo yena othe kaboni uhulumende kaMongameli Emmerson Emmerson Mnangagwa ewahlonipha amalungelo kazulu.
