Ibandla leMDC lithi imbiko yeZimbabwe Anti-Corruption Commission yokuthi kuleUS$7 Billion efihlwe phetsheya yiziphathamanda zikahulumende kanye labake baba kuhulumende, iveza ukuthi izikhohlakali ezinengi ngamalunga eZanu PF.
Umgcinisihlalo wekhomishini le uNkosikazi Loise Matanda-Moyo utshele iphephandaba leHerald ukuthi imali le ifihlwe emazweni afana leMelika, iBhilithani, iSwitzerland, Singapore, Hong Kong, Malaysia, Mauritias kanye leSpain.
Uveze njalo ukuthi ikhomishini yakhe iphakathi kwemizamo yokuthi ithathe limali iyilethe eZimbabwe. Kodwa abebandla leMDC bathi ikhomishini le izama ukuvala nje abantu amehlo.
“IZAAC ilohlupho olulodwa, angiboni ukuthi kulomuntu olokhu elethemba kiyo,” kutsho umgcinisihlalo weMDC eMatabeleland North uMnu Prince Dubeko Sibanda.
“Nxa besithi badinga imali, yindaba begijima besiya khatshana bengaqali ngemali zeCommand Agriculture ezikhanyayo ezikhonapha eZimbabwe okwaziwayo lokuthi abazidlayo ngobani.”
Ilunga leZanu PF uMnu Believe Gaule yena utshele iStudio 7 ukuthi uyayisola kakhulu imisebenzi yenkohlakalo. Kodwa uthe izikhohlakali ezinengi zazikuhulumende kamuyi uMnu Robert Mugabe.
“Akhona sibili amasela lakuhulumende lo okhona kodwa amasela amanengi ayekuhulumende kaMugabe,” kutsho uMnu Gaule.
