NgoMgqibelo uBulawayo emanyene lenhlanganiso elwisana lobugwelegwele eyeTransperancy International Zimbabwe babambane lomhlaba jikelele benanza ilanga labesifazana bethi uhulumende kumele abone ukuba uyagcwalisa okuyingxwenye yekhulu ekutholiseni amathuba alinganayo phakathi kobulili kumisebenzi yonke yesizwe kanye lokulwisana lendaba zokuhlukuluzwa kwabomama bebanjwa ngamandla ukuya emacansini.
Ilunga ledale lephalamende elivule lumhlangano, uNkosikazi Stella Ndlovu uchaze ukuba abesifazana lokhe bebhekane lokutholiswa amathuba ngokuya emacansini ethi kumele kuphele.
''Linyanga ngeyabomama, besilinanza kodwa kulezi insuku kulodubo lokutholisa omama labafundi ngokuvula imilenze ngakho singavumi bomama udubo kungavuma oyedwa ababili kuyahlupha. Sekumele uma kuvuma singene sikhankasele ukuqeda uhlupho lokutholiswa amathuba ngecansi,'' kutsho uNdlovu.
UNkosikazi Ndlovu uqhubekele phambili ekhuthaza uzulu ukuba akhulise abantwana ngokufanayo kungakhathalekile ngobulili babo kumisebenzi abathi bayenze.
''Uhlupho esibhekane lalo lusukela emuva ukuba umntwana uqakathekile ukudlula oyintombazana, kodwa abazali bakhathesi sebekwazi ukukhulisa abantwana njalo lokuthi umzimba womntwana oyinkazana umzimba wakhe uqakathekile njalo kuhle ukuba abazali bakhulise abantwana njalo beyeke ukupha abantwana ngobulili,'' kutsho uNdlovu.
UKhansila kaWard 17 edolobheni lakoBulawayo, uNKosazana Sikhululekile Moyo uvumelane loNdlovu ethi ilanga labesifazana liqakathekile ekuthuthukiseni impilo zabesifazana.
''Ilanga lalamhlanje liqakathekile ekuthuthukiseni impilo zethu lokutholiswa amathuba alinganayo kungakhathalekile lobulili. Kumele sikhulise abantwana ngokufanayo njalo izipho esibathengela zona zingaqakathekisi ubulili obuthile obuzakwenza bazizwe belahlekile empilweni,'' kutsho uNdlovu.
lsakhamuzi sakoBulawayo, uNkosikazi Siduduzile Dube uthi kulilanga eliqakathekileyo kodwa umuntu wesifazana kumele aqale azazi empilweni njalo isikhathi esinengi omama abaphakamisani.
''Ilanga lalamhlanje liqakathekile kakhulu ngoba kulapho esithola khona amathuba okukhulumisana sibonisana ngenhlupho zethu. Kuvamile ukuba umuntu ongumama engahlukuluzwa ngowesilisa singamzweli njalo isikhathi esinengi asiphakamisani njengabomama sidonselana phansi,'' kutsho uDube.
Obona ngenhlelo zemithetho eTransparency International Zimbabwe, uNkosazana Marylin Sibanda uthi sekuleminyaka angamatshumi amabili lanhlanu omama lokhe bengatholiswa amathuba alinganayo njalo bavame ukutholiswa amathuba ngokuya emacansini.
Kutsho uSibanda: ''Lokhe kwabalesivumelwano seBeijing osekudlue iminyaka engamatshumi amabili lanhlanu akulanto esithe yaphuma. Thina sikhangelele ukuba singathuthukisa kanjani ukuba omama bengatholiswa amathuba ngokuya emacansini lokuthi kubelomthetho oqinileyo omelana lokuya emacansini ukuze uthole amathuba amahle ngoba okwamanje akulamthetho omelana lalesisenzo.
''Thina kuhulumende le yimihlangano esiyenza silungiselela ukuba lelanga elikhulu mhla zingamatsumi amabili kuyonale inyanga eMcDonald Hall eMzilikazi ngaphansi kwendikimba ethi ''Beijing plus 25 the Journey Towards Women Empowerment in Zimbabwe. Successes and Challenges.''
UNkosikazi Domicica Muringi, okugatsha lwabesifazana koBulawayo uchaza ilanga elikhulu elizakubakhona eMcDonald Hall eMakokoba mhlazingamatshumi amabili kuyonale inyanga..
Uhlangano walamhlanje uhlafune inhlupho ezimbablwa ezibhekane labesifazana ezibangela ukuba bengafinyeleli ekutholisweni amathuba alinganayo kungaqakathekiswa ubulili. imithetho kanye lenhlelo ezingaqhutshwa ekutholisweni amathuba alinganayo.
Okumqoka abesifazana abakuvumeleneyo yikuthi bakhankasele ukubunjwa komthetho ozajezisa abantu abazafumanwa besebenzisa ucansi ukutholisa abesifazana amathuba amahle.
