amalinks wokungena

Breaking News

Ezinye Izakhamizi zeMzimuni, Enyakatho yeGwanda, Sezisidla Kanye Ngelanga Ngenxa Yendlala


Izakhamizi zeMzimuni, eGwanda North, zibhekane lendlala embi. Lapha ziholiswa irayisi eqoqwe ngumeli wazo ephalamende uMnu Madodana Sibanda.

Izakhamizi ezinengi eMzimuni, eGwanda North, zithi sezisidla kanye ngelanga ngenxa yendlala. Zithi njalo ukudla ezikuholiswayo akwaneli lutho.

Izakhamizi lezi zithi ukusilela komumbu lempuphu elizweni kwenza umumo ube mubi ngamandla.

NgeSonto umsakazo weStudio 7 wethekelele eMzimuni wathola kuphithizela izakhamizi ezedlula amakhulu amabili ziholiswa irayisi evele kweleChina eqoqwe ngumeli wedale lephalamende eGwanda North uMnu Madodana Sabanda.

Abantu abalitshumi lasikhombisa bebesabelana isaka elilodwa le50kg.

Kodwa omunye wabantu laba uNkosikazi Paulina Moyo utshele iStudio 7 ukuthi ukudla lokhu akweneli osekubangela ukuthi abanengi badle kanye kuphela ngelanga.

"Lonyaka indlala inkulu iyafana nje leyomnyaka ophelileyo okokuthi lokudla sidla kanye ngelanga. Akudliwa emakhaya lapha kunzima mntanami, lemali zokubhadalela abantwana esikolo asilazo," kutsho uNkosikazi Moyo.

Esinye njalo isakhamuzi, uNkosikazi Liznet Nyathi, uthi lanxa bethola ukudla okuvela kuhulumende bayakusebenzela lokhu kudla.

"Mina ngiyahola kuSocial Welfare ngoba ubaba semdala, so siyakusebenzela ukudla lokhuyana siyashandira emigwaqweni sihamba silungisa imigwaqo sifaka amatshe," kutsho uMaNyathi.

"Yikho lapho esizuza khona lemali yokuthi sibhadale amasaka lawana siyakhipha ama$30 ukuthi uze uyithole imali yakhona; sithwele nzima."

Ezinye njalo izakhamizi zikhala ngokuthi ukudla ezikuholayo kuyabe konakele. Ngokunjalo, zithi zicina zikulahla lokhu kudla.

"Ukudla kwakhona okusizwisa ubuhlungu yikuthi kwesinye isikhathi siyabe sikuphiwa sokungani kubolile," kutsho uNkosikazi Regina Ngwenya.

"Besikhipha khonaphana okunye ungathi yizigaqa kubolile. Sokungani ngapha kithi kuzolahlelwa nje ukuthi 'abantu bendlala labana siyebapha khonokhuyana vele bazathini'."

Inhlanganiso esiza uzulu ngokudla eyeWorld Food Programme (WFP) ithi izakhamizi zemaphandleni ezifika phose izigidi eziyisithupha 5,5 million zibhekane lendlala embi njalo kumele zisizwe ngokudla ngokuphangisa.

please wait

No media source currently available

0:00 0:04:55 0:00

Facebook Forum

XS
SM
MD
LG