UMongameli Emmerson Mnangagwa uthi umbuthano wokunanza ilanga likazibuse kanye lombukiso weZimbabwe International Trade Fair (ZITF), ebizakwenzelwa koBulawayo ngenyanga ezayo, kayiseyikwenziwa emizameni yokwehlisa ingozi yokumemetheka komkhuhlane weCoronavirus.
Ekhuluma lentathelizindaba ngoLwesibili, uMnangagwa wazise njalo ukuthi uhulumende usethethe inyathelo lokuvimba imibuthano yonke elabantu abedlula ikhulu egoqela eyokukhonza, eyemitshado kanye leyemidlalo.
Uthe imibuthano le kayisoze ivunyelwe okwenyanga ezimbili. Wengeze wathi uhulumende uzakutsho ngemva kwalesosikhathi ukuthi kuyiwa phambili njani, kusiya ngokuthi ingozi yomkhuhlane lo iyabe ilokhe isakhona na.
Kodwa uthe izikolo kazisoze zivalwe buthumuthumu ngoba sezisalelwe ngamaviki amabili kuphela ukuthi i-term ifike emaphethelweni.
UMnangagwa uthe bathethe amanyathelo lawa emizameni yokwenqabela umkhuhlane weCoronavirus lanxa ungakafiki eZimbabwe.
Ngokunjalo, uthe kuqakathekile ukuthi uzulu alalele inkuthazo yakhe leyengcwethi kwezempilakahle mayelana ngendlela zokuzivikela ezigoqela ukugeza izandla lokungabuthani.
UMnangagwa ukhuthaze uzulu ukuthi ebambane ekulwisaneni lomkhuhlane lo kungakhathalekile ukuthi ngowaliphi ibandla lezombusazwe.
“Imbuthano yabantu abedlula ikhulu egoqela eyokukhonza leyemitshado izavalwa okwenyanga ezimbili. Sizakwazisa uzulu ngemva kwalokho ukuthi kuzahamba njani,” kutsho uMnangagwa.
NgoLwesibili iCoronavirus ibisibulele abantu abedlula kancane inkulungwane eziyisikjhombisa ezilengxenye, 7,527 emhlabeni jikelele.
Ukhansila wakoBulawayo uMnu Mlandu Ncube utshele iStudio 7 ukuthi bayakujabulela ukuthi umbukiso weTrade Fair lomkhosi welanga likazibuse isidluliselwe phambili ngoba ibizafaka uzulu engozini enkulu.
“Siyasamukela isinqumo sokumisa imikhosi le yomibili. Okuqakathekileyo yikuthi sivikele impilo zabantu; sivikele impilo zabantu bakoBulawayo,” kutsho uMnu Ncube.
Amazwi kaNcube agcizelelwe yingcwethi kwezombusazwe uMnu Effie Dlela Ncube yena ochothoze uMnangagwa ngokungavali izikolo esithi ufaka impilo zabantwana engozini yokuhlaselwa yiCoronavirus.
“Yikungazwisisi ingozi yeCoronavirus, kungenzeka ukuthi ibe isichithekele yonke indawo. Kanti-ke ukuvalwa kwezikolo yikuvikela,” kutsho uNcube.