UMongameli Emmerson Mnangagwa uthi imingcele yeZimbabwe isivaliwe ngenjongo yokwenqabela ukumemetheka komkhuhlane weCoronavirus kulandela ukubhubha komuntu wakuqala elizweni ngalumkhuhlane izolo.
Kodwa imbiko esiyamukele namuhla ekuseni ithi umngcele weBeitbridge ubulokhe uvuliwe abantu bephuma lokungena kungelamigoqo.
Ekhuluma kumabonakude izolo ebusuku, uMnangagwa wazise njalo ukuthi indawo zokuzilibazisa ezifana lamabhawa kanye lalapho okubukelelwa khona amafilimu sezivaliwe ngesizatho sinye.
Uxwayise abantu ukuthi bengahambahambi mahlayana, esithi kumele bahlale ezindlini.
UMnangagwa uphinde wehlisa inani labantu asebevunyelwa ukubuthana ndawonye lisuka kukhulu elilodwa lisiya kumatshumi amahlanu.
Kodwa okumangalisayo yikuthi umlayo ofakwe kugwalo lukahulumende okweGovernment Gazzette izolo emini uthi imibuthayo yonke isivaliwe kungakhathalekile ukuthi ngeyabantu abangaki.
Umlayo lo uthi njalo abazatholakala bewephula balakho ukuvalelwa ejele okomnyaka.
UMnangagwa uthe abathengisayo bazaqhubeka ngomsebenzi wabo.
Amanyathelo la aza ngesikhathi uhulumende esithi sokulabantu abathathu asebetholakale beleCoronavirus okugoqela lo obhubhe izolo uMnu Zororo Makamba, obeyindodana kasomabhizimusi uMnu James Makamba.
Olwela amalungelo oluntu uMnu Bekezela Maduma Fuzwayo utshele iStudio 7 ukuthi lanxa izinqumo zikaMnangagwa lezi zibuhlungu, kumele zilandelwe ukuze kulondolozwe impilo.
Khepha ingcwethi ecubungula ezombusazwe uMnu Effie Dlela Ncube uthi lanxa ukuvalwa kwemingcele yelizwe kufanele, kutshiya uzulu esebunzimeni obukhulu ngoba engasenelisi ukuphuma ayethenga ukudla lezinye indingeko zempilo ezisilelayo eZimbabawe.
UMongameli weSouth Africa uMnu Cyril Ramaphosa yena wazise ukuthi kuqala ngoLwesine uzulu welizwe lakhe kuzamele ahlale ezindlini okwamaviki amathathu emizameni yokwenqabela ukuthelelwana kweCoronavirus.