amalinks wokungena

Breaking News

Abalemali Bathenga Ukudla Ngobunengi Besesaba Igcikwane leCoronavirus


Bathenga impahla ngobunengi.

Abantu bakoBulawayo sebeveza ukungahlaliseki ngegcikwane leCoronavirus njalo inengi selithenga ukudla okunengi becabangela ukuba uhulumende uzavala ilizwe ngensuku ezizayo. Intengo yokudla okumqoka isikhuphukile, okwenza inengi lehluleke ukuthenga kukunengi.

Omunye wezakhamuzi zakoBulawayo unkosikazi Comfort Nare uthi abala siqiniseko ngakusasa, ngakho kuyadingeka ukuthi bahlale bezilungisele.

“Thina ikusasa yeZimbabwe asikwazi ukuthi imi ngaphi ngoba kunje kunje uhulumende kakaphumeli egcekeni ukuthi vele kuzwenzwa njani.

Sesehlala sizilungiselele sithengile ukudla, laloba lakho sekukhwelile. Impuphu engange 10kg isuke ku $190 yaya ku $220, le ekahulumende ye $70 i 10kg vele asikhulumi ngayo ngoba vele ayitholakali. Abe black market labo sebekwezile, asisakwazi ukuthi senzeni sikhonapha kambe i cooking oil I 2litres yi $119 uyabe uhola malini lapha eZimbabwe ukuthi uthenge ukudla okuzatshova isikhathi eside,” kutsho uNare.

Unkosikazi Mellisa Zulu ongumbalisi uthi uzwa elokwesaba okuyikho okubenza bathenge ukudla ngapha lemali bengelayo.

“Kunzima bantu sesiseba khonalapha, sesisesaba sokunzima. Sesi forced ukuthi sithenge izinto in bulky ngapha lemali yakhona ayikho, thina asisakwazi. Ngapha lempuphu ma ufuna ukuyithenga uyayibona ngaphi kunje, sesiforced ukuthi sithenge kudura phandle. Ah sokunzima sesisesaba asisakwazi lokuthi senzeni,” kutsho uZulu

Unkosikazi Linda Siziba oyisakhamuzi sakoBulawayo uthi akula lutho olukhulunywa nguhulumende osokubenza bazicabangele ukuthi mhlawumbe ilizwe lingavalwa.

“Ngomumo lo lange Corona izinto ziyadula, khathesi simile silayinele impuphu ngapha lempuphu yakhona iyadula. Lemali asila, sesithengiswa yikuthi sicabangela ukuthi kuzaba le lockdown kucine kuthwa singasaphumi ezindlini. Uhulumende akala information asinaka yona ukuthi senzeni, so sesizenzela sizicabangela njengabantu. Lomkhuhlane ungani usugcwele lawo kuthwa ukhona elizweni lethu,” kutsho uSiziba.

UMnu. Elliot Ncube esinye njalo isakhamuzi sakoBulawayo uthi kala siqiniseko sokuba ukuhulumende uzancedisa okunganani ukuba abantu bathole ukudla, lamaphilisi nxa umkhuhlane weCovid 19 usumemetheka elizweni.

“Asila sure lokuthi uhulumende uzasincedisa okungakanani ngokuthi sibe le access yemali, lokudla, lakho ukudla kwakhona sibe kwazi ukuthi ama Silos alakho yini ukudla ngoba sikubon kuya shota. Abanye abagulayo abathatha amaphilisi asikwazi ukuthi bazaba le access yini. Nxa umkhuhlane lo ungamemetheka la I Zimbabwe iyavalwa ngokubona kwami. I state of preparedness yelizwe ayizwakali, kusasa uyazwa lokhu kusasa lokhu. Ngani sikweyinye iplanet asikho kwabanye abakhanya bekhala ngomkhuhlane lo.”

UMnu. Effort Ncube owenhlanganiso yamalungelo abathengi eye National Consumer Rights Association uthi uzulu akumelanga athenge izinto ngobunengi.

Kutsho uNcube: "Kusengeka ukuthi ngalesi isikhathi kuvalwa izinto laba abangathi bale mali engcono kulabanye, babuthe izinto eziqakathekileyo ezidliwayo ngekhayo lezisetshenziswayo ama sanitizer ayiwo ancedayo ukuvikela umkhuhlane we Corona. Ngakho kuqakathekile ukuthi abantu bakhunjezwe ukuthi bangayenzi leyi into ngoba iyabulala abanye ikakhulu laba abengenelisi ukuthenga kube kunengi."

Umongameli Emmerson Mnangangwa wethule umbiko esithi indawo ezinjenge mikambo ezibiza abantu abanengi zingavalwa loba nini emizameni yokwanqabela ukumemetheka lokuthelelanwa kwegcikwane leCovid 19.

Uzulu wakoBulawayo ubonakale namhlanje esethenga ukudla ngenqwaba nqwaba ezinengi ngemva kokucabangela ukuthi uhulumende uzavala ilizwe.

Inengi Labantu lithi uhulumende yikuthi katsho lutho ngokuphathelane lokudla lokunye okuqakathekileyo empilweni zabantu, osokubenza bazithathele izinqumo abazibona zifanele.

Facebook Forum

XS
SM
MD
LG