Zithwele amaphaphu ngezandla izakhamizi zemaphandleni eZansi yemaNdebeleni kulandela ukuqhamuka kwegcikwane leCorona kuleli osekudale ukufa koyedwa.Inengi lithi ukuswelakala kolwazi ngalumkhuhlane kanye lemithi emakilinika sekudale ukuthi bahlale evalweni.
Inengi lezakhamizi lithi liyesaba ukuthi lizakufa liphele du ngalumkhuhlane osubulele abantu abazinkulungwane ezifika phose amatshumi amabili lasikhombisa 27 000 emhlabeni yonke jikelele.
UNkosazana Siphathisiwe Nkala oweSilikwe uthi bahlalele evalweni besesabela ukuqhamuka kwalumkhuhlane esiqintini sabo.
“Thina njengezakhamizi sethukile kakhulu ngalumkhuhlane okuthiwa yiCorona ngoba sizwa kuthiwa awuyelapheki awula muthi ongelatshwa ngayo njalo into esethusa kakhulu yikuthi akula sizo ongaluthola khona ekilinika ngoba sikhuluma kunje ungaze utshaywe likhanda kumbe umntwana atshise uhambe ekilinika akula ncedo ongaluthola pho okungaze kuthi umkhuhlane omkhulu ongaka ngendlela esikuzwa ngayo njalo sisethuswa yikuthi kufa labantu abalemali emazweni amakhulu khonangapho pho thina esivele singela luto kuyasethusa kakhulu,” kutsho uNkala.
UMnu Gibson Moyo isakhamuzi seNtshene esabelweni seNswazi uthi basele bethithibele ngendlela lumkhuhlane ovela ngayo, uthi kakatholi ulwazi olugcweleyo ngaleligcikwane.
“Angikahlangani labantu kakhulu abagxile kuyo kakhulu , ngiphonguzwa laphana ukuthi kumele lihlale emakhaya lingayindawo, sike saba lalokhu okuthiwa yiAIDS layo saqala siyizwela khatshana siyizwele khatshana kuthe sekumuva sabona lakhona sikhona abantu sebeselatshwa sayibona so naiba lokumangala nsa kuthiwa ama border sevaliwe sekutheni kusethuse kakhulu,” kutsho uMoyo.
UNkosazana Santa Mabuya oyisakhamuzi seSitezi uthi iyadingeka imfundiso ebanzi ngaleligcikwane emakhaya
“Sicela uhulumende akhiphe izisebenzi zakhe zihambe njengalokhu akade kwenziwa kubalwa abantu bebegcwele behamba door to door besibala lakathesi abahambe door to door besifundisa ukuthi lizibambe so liyenze so ukuze lithe-he license so nxa bengakwenzi thina ngapha emakhaya sizaphela asikwazi kumbe bafundisa emadolobheni thina ngapha asila muntu osifundisayo,” kutsho uMabuya.
Sixhumane loMnu Abrahama Nkiwane eBezha yena odabuka eManxeleni eNtabazinduna njalo eleminyaka yokuzalwa engamatshumi ayisitshiyangalolunye lambili othi uzulu kumele alandele izeluleko aziphiwa ngabazempilakahle ukuze aphephe kuleligcikwane.
“Asifanele ukuthi sibe ngamatshapha nxa kulezicebiso esiziphiwayo ngamadokotela ngoba bayabe sebebonile umkhuhlane lapho oyakhona ngoba sebeyazile ngamatests abawayenzileyo kulabo abaficane belakho so kumele sihloniphe sizile singadlali ngakho,” kutsho uNkiwane.
UMongameli welizwe uMnu Emmerson Mnangagwa uthi kusukela ngoMvulo wonke umuntu kuleli kuzamela ahlale endlini yakhe njalo kakho ozavunyelwa ukubhodada bhoda okwensuku ezingamatshumi amabili lanye ezilandelayo.
UNkiwane uyalisekela Lelinyathelo: “Hlala endlini yahoo, like lilalelisise kuyedlula , iminengi kwakulabo Freza, ekucineni kwempi yamaJelimani yakuqala eka 1914 krabba leNdingidi kwaba leSmall pox kwaba lani kube leAIDS kathesi kathesi konke kuyedlula bengabi lesibindi sento abangayaziyo , nxa kuthiwa nansi iNgwe baleka uye lapho abanye ababaleka besiya khona.”
Abezempilakahle bath bayisikhombisa asebetholakale laleligcikwane kwathi oyedwa wafa kuleli njalo bakhuthaza uzulu ukuthi ageze izandla kokuphela ngamanzi alesepha njalo ahlale emakhaya ukuze enqabele leligcikwane.
