Amapholisa eGwanda ngoLwesibili abisele muva izakhamizi ebezibuthene kwesinye sezitolo ezinkulu eseWholesale ukuzothenga impuphu.
Lokhu kwenzakala ngelanga lesibili uhulumende weZimbabwe ethethe isinqumo sokuthi abantu behlale ezindlini okwamaviki amathathu ukuze kwenqatshelwe ukumemetheka lokuthelelanwa kwegcikwane leCoronaVirus.
"Bakithi lesi yisimemezelo senza siphile sonke siphephe ngobba nxa sihlezi ezindlini siyehlisa ukumemetheka komkhuhlane , siyacela bakithi ukuthi singalitholi liphandle njengamapholisa kulicala ukukwenza lokhu ukutholakala uphandle ngasenalesi sikhathi esifakwe nguMongameli ese 21 days," leso yisimemezelo samapholisa.
Inengi lezakhamizi zeGwanda ngoMvulo litshone lisezindlini ngemva kwesinqondiso esethulwe nguhulumende kanye lesimemezelo samapholisa sokuthi uzulu wakuleli ahlale emakhaya ukuze enqabele ukumemetheka lokuthelelanwa lula kweCoronavirus.
Kodwa lamhlanje ekuseni izakhamizi ziphume ezindlini ngemva kokuthola udletshane lokuthi kulempuphu esitolo esikhulu sakoGain Wholesalers.
Amapholisa afike kulesisitolo lapho impuphu isethulwa emoteni atshela uzulu ukuthi achithike ehambe emakhaya okudale ukuthukuthela kwezakhamizi.
“Sibulawa yindlala so okungabulaliyo kuyini, umkhuhlane uzasibulala lendlala izasibulala, asila mpuphu ezindlini besilayine koMkoko basixotsha last week sasilayine ko OK for more than 12 hours kodwa impuphu asiyitholanga. Vele loktu siyakwazi bayathenga bona impuphu amapholisa beyezifaka ezindlini zabantu abantu sebethengisa nge R150 njengalapha eGwanda vele kuvamile bebesethusela ngokusitshaya bona beqeda lapho bathenge impuphu bayefaka ezindlini,” kutsho isakhamuzi.
Isikhulumeli samapholisa eZansi yemaNdebeleni uChief Inspector Philisani Ndebele utshele izakhamizi ukuthi limpuphu izathuthelwa ezitolo zemalokitshini lapho ezathengiselwa khona. UNdebele uthi uzulu kumele alandele iziqondiso ezethulwe nguhulumende.
“Uyathola ukuthi umuttu uyathenga izinto ezincane , uyathenga one item abuyele endlini ngokungumkhuhlane engikubonayo ukuthi abantu bafuna nje ukuthi babe phandle kwezindlu kodwa thina njengamapholisa eZimbabwe Republic Police silama team on the ground okuthi enforce ukuthi abantu behlale ezindlini,” kutsho uChief Inspector Ndebele.
UMnu. Admire Ngubo uthi ubone kuqondile ukuthi uzulu ahlale emakhaya ngalesisikhathi ukuze aphephe kuleligcikwane.
“Mina ngibona improper ngoba nxa singasakuthwalanga ingxenye kusitshaye,so that is a preventive measure ngingathi ngamfitshane ngingathi its appropriate ngoba bazakubona njani bengasazamanga indlela ezinje ngazonalezi loku spreader kwangikhona bazakubona njani abantu laba bafuna ukuba letrace yokuthi into leyi ibuya jani,” kutsho uNgubo.
Ngaphandle kodubo lwempuphu abantu kulelidolobho ikakhulu abahlali beSpitzkop North baphuma ezindlini ukuyadinga amanzi kodwa uMeya weGwanda uMnu Jastone Mazhale uthi bakhona abakwenzayo ukuze baqede udubo lwamanzi kulindawo.
“Kungesikhathi eside lizabona amabowser sekhona endaweni eziyabe zikhethwe ngabe Engineering besebenza lamakhansila ukwenzala ukuthi amanzi atholakale njalo labantu bakhelele ngezikhathi ezithize ukuze labo bengathelelani lowo mkhuhlane," kutsho uMazhale.
Kusenjalo amapholisa sebophe izizalwane zakwele Ethopia ezilitshumi lanhlanu ezitholakala komunye umuzi eSwitsha eGaranyemaba izolo ngemva kokuba zehluleke ukuchaphela kweleBotswana ngoLwesithathu kuviki eyedlulileyo.
Oyedwa walezi ziphepheli uthwalelwe esibhedlela esikhulu seGwanda lapho agcinwe yedwa ngoba engezwa kuhle kuthi abanye basagcinwe khonale eSwitsha besadingelwa indawo lapho abazavalelwa khona eGwanda phambilini kokuthi bahlolwe.
Abezempilakahle bathi kakho phakathi kwabo obonakala elegcikwane Corona.
Sebeyisitshiyangalombili abatholakale belegcikwane leCoronavirus eZimbabwe labulala oyedwa.