amalinks wokungena

Breaking News

UMaKhupe Uthi Uyathokoza Ngesinqumo Senkantolo Esokuthi Nguye Uqobo Umholi weMDC, Khepha uChamisa Uthi Uyazikhohlisa


Umkhokheli webandla leMDC-T uNkosazana Thokozani Khupe uthi uyathokoza ngesinqumo somthethwandaba weSupreme Court esokuthi nguye umkhokheli weMDC uqobo, hatshi uMnu Nelson Chamisa.

Umthethwandaba lo unqume izolo ukuthi uChamisa wangena esikhundleni ngaphandle komthetho.

Uthe uMaKhupe nguye owayemele aphathe intambo kulandela ukufa kukaMnu Morgan Tsvangirai kuze kukhethwe umkhokheli webandla omutsha.

Ngokunjalo, uthe kumele ibandla leMDC libuyele kungatsha zobukhokheli balo ezazikhona ngo2014, lapho elacina khona ukwenza umhlangano weCongress libambene lingakadabuki laba yiMDC Alliance ekhokhelwa nguChamisa leMDC-T kaMaKhupe.

Kodwa ibandla likaChamisa lithi isinqumo lesi asiguquli lutho ngoba inxezu zombili sezaba ngamabandla azimeleyo ngemva kokuqhuba imihlangano yawo yakukhetha inkokheli ezintsha.

Kodwa uMaKhupe uthi nguye oseziphethe esidukwini njengokutsho kwenkantolo. “Lesi yisinqumo ebesisimelele, ngiyajabula ngaso kakhulu,” kutsho uMaKhupe.

please wait

No media source currently available

0:00 0:02:03 0:00

Isinqumo lesi sikhanya sesihle sabangela ukudabuka phakathi kweMDC kaChamisa ngoba amanye amalunga ayo abalisa uMnu Morgan Komichi loMnu Douglas Mwonzora behle basamukela besithi uChamisa kasenguye umkhokheli webandla labo.

UKomichi utshele intathelizindaba ukuthi nguye osengumginisihlalo weMDC njengoba inkantolo ithe kubuyelwe kubukhokheli obabukhona ngo2014.

Uthe njalo kuzaqhutshwa iCongress phakathi kwenyanga ezintathu ezilandelayo ukuze bakhethe inkokheli entsha.

Isinqumo lesi sikhanya sizabangela njalo ukulwisana okukhulu phezu kwempahla yebandla efana lezimota lamahofisi.

Isikhulumeli sikaMaKhupe uMnu Khaliphani Phugeni utshele iStudio 7 ukuthi bazazilandelela zonke impahla zeMDC ezisezandleni zikaChamisa labanye bakhe.

please wait

No media source currently available

0:00 0:02:37 0:00

Khepha abeMDC kaChamisa bona bathi isinqumo senkantolo lesi siyize nje ngoba uMaKhupe sowabumba ibandla lakhe yedwa.

Omunye wabasekeli bakaChamisa uMnu Tendai Biti uthe ngalokho, akulautho olutshintshayo.

Amazwi kaBiti agcizelelwe yisikhulumeli sebandla lakhe koBulawayo uMnu Swithern Chirowodza.

please wait

No media source currently available

0:00 0:03:18 0:00

Facebook Forum

XS
SM
MD
LG