Umcebisi kaMongameli Emmerson Mnangagwa, uMnu Shingi Munyeza, uqhubeka echothoza uhulumende weZanu PF esithi ugcwele amasela lababusi abalochuku.
Ngakho, uthi sesifikile isikhathi sokuthi uzulu asukume azikhulule kulobu bubi.
UMunyeza, ongumfundisi, uqale ukusola uMnangagwa lohulumende wakhe emphakathini ngenyanga edluleyo.
Kuntshumayelo ayethule ngeSonto, uMnu Munyeza uthe sesifikile isikhathi sokuthi uzulu ebambane esuse uhulumende kaMnangagwa.
Okumangalisayo yikuthi yena uMnangagwa ulokhu engakamxotshi.
Amazwi kaMunyeza aza ngesikhathi uzulu weZimbabwe ekhonona ngobunzimba bempilo ngenxa yomnotho welizwe osuguqe ngamadolo.
Olwela amalungelo oluntu uMnu Charles Nyoni utshele iStudio 7 ukuthi lanxa evumelana lamazwi kaMunyeza, kunzima ukuthi amkholwe ngoba engumuntu olembali ende esebenza leZanu PF.
Isiphathamandla sebandla leZanu PF uMnu Joseph Tshuma yena othi uMunyeza engaba esechothoza ibandla lakhe ngoba lokho abekuthola kungasekho.