Inhlanganiso emela odokotela eyeZimbabwe Senior Hospital Doctors Association ithi umumo usumubi kakhulu ezibhedlela kulandela ukukhalala umsebenzi kwabodokotela, abongi kanye lezinye izisebenzi zogatsha lwezempilakahle zikhala ngeholo eliphansi.
Ngokunjalo, inhlanganiso le ithi uhulumende kumele aphange alungisise udaba lolu ukuze odokotela babuyele amsebenzini banakekele izigulane.
Isole njalo ukutshaphazwa kwemali eqondane lokulwisana lomkhuhlane weCoronavirus, ethi kwenziwa yiziphathamandla zikahulumende.
Odokotela labongi bakhalale umsebenzi ngeviki edluleyo lanxa uhulumende ebengezelele iholo besithi okuyimadlana kwakhona akubaphathisi ngalutho.
Bathi njalo bafuna ukubhadalwa ngedola leMelika. Lokhu kuza ngesikhathi abanye besithi uhulumende kumele esule idola leZimbabwe kusebenze imali yeMelika.
Kodwa ocubungula ezenotho uMnu Reggie Shoko utshele iStudio 7 ukuthi ukusebenzisa idola leMelika kuphela kungaba liphutha elikhulu.
