Inani labantu asebebanjwe umkhuhlane weCovid-19 eZimbabwe likhwelile njalo ngabantu abathathu izolo laya kumakhulu phose amahlanu, 489.
Asebefile sebeyisithupha kulandela ukubhubha kwabantu ababili ngoMgqibelo.
Omunye wabantu laba ngowakoBulawayo kuthi omunye ngoweMidlands.
Ugatsha olubona ngezempilakahle luthi phakathi kwabathathu ababanjwe igciwane leCoronavirus izolo, ababili bavele kweleSouth Africa kuthi oyedwa ngobevele ehlala elizweni.
Asebesindile kumkhuhlane lo sebengamatshumi ayisithupha lane, 64.
Inani labalomkhuhlane lo kulezinsuku likhuphuka mihla lamalanga njalo abanengi abalawo ngabavela kweleSouth Africa.
Isiphathamandla senhlanganiso elwela amalungelo oluntu eyeIbhetshi likaZulu uMnu Mbuso Fuzwayo utshele umsakazo weStudio 7 ukuthi uhulumende uyehluleka ukuluphatha kuhle udaba lomkhuhlane lo.
