Inhlanganiso emela izisebenzi eyeZCTU ithi uhulumende kumele aqinise isandla ajezise abaqhatshi abayizizalwane zakweleChina abahlukuluza izisebenzi zabo ezingabantu abansundu.
Inkuthazo le ilandela ukudutshulwa kwezisebenzi ezimbili ngumnikazi womunye umgodi wegolide odabuka eChina, eGweru ngeSonto.
Isizalwane sakweleChina lesi uZhang Xueun udubule walimaza izisebenzi zakhe, uMnu Wendy Chikwaira loKennedy Tachiona ngemva kokuba bembuze ngeholo labo.
Isehlakalo lesi sithukuthelise abantu abanengi ababone umsolwa edubula ababili laba kuVideo ethethwe ngezinye izisebenzi.
Umsolwa ubotshwe wetheswa icala lokuzama ukubulala.
I-ZCTU ithi okudanisayo yikuthi zinengi izisebenzi zeZimbabwe ezitshona zihlukuluzwa ngabaqhatshi abadabuka kweleChina kodwa uhulumende engenzi lutho.
Isigodlo seChina eZimbabwe sona sithi sisekela imizamo yokuphenya isehlakalo lesi.
Kodwa unobhala jikelele weZCTU uMnu Japhet Moyo uthi uhulumende kumele atshiyane lokuphatha izizalwane zakweleChina lezi ngesandla esibuthakathaka.
Kusenjalo, isiphathamandla senhlanganiso emela ababalisi bemaphandleni eyeAmalgamated Rural Teachers Union of Zimbabwe, uNkosazana Sheilla Chisirimunhu, yena obotshwe izolo uzamiswa emthethwandaba eMasvingo namuhla esetheswa icala lokuqoqa ukutshengisela kwababalisi engazisanga amapholisa.
Ababalisi laba batshengisele bekhala ngeholo eliphansi.
Ababili njalo ababotshelwe ukupha abafundi amaphetshana abhalwe ukuthi abesifazana beMDC Alliance abagoqela uJoana Mamombe kumele bakhululwe, labo bazamiswa enkantolo kamantshi eChinhoyi namuhla.
Ababili laba ngumsekeli kamkhokheli weZINASU uFaustina Madava loLionel Shayahamba. Abasolwa bobathathu bazamelwa ngamagqwetha eZimbabwe Lawyers for Human Rights.
