Umkhankaso wokukhuthaza uzulu weZimbabwe ukuthi atshengisela ezitaladeni phezu kokonakala komnotho mhlaka 31 kulinyanga kungakhathalekile ukuthi umuntu usekela liphi ibandla lezombusazwe usugxilile njalo ukhanya usekelwa ngabanengi.
Lumkhankaso uqhutshwa ikakhulu enkundleni zokuxhumana ezifana leTwitter leFacebook.
Abamabandla aphikisayo abathi bazaphatheka kulokhu kutshengisela bagoqela umkhokheli webandla leTransform Zimbabwe, uMnu Jacob Ngarivume, uMnu Nkosana Moyo, uMnu Noah Manyika, kanye lomkhokheli weMDC Alliance uMnu Nelson Chamisa.
Abane laba bathi uzulu kumele atshengisele ebambene asuse ibandla leZanu PF embusweni ngoba selehlulekile ukubusa lokuvuselela umnotho.
Umsekeli wesikhulumeli seMDC Alliance uMnu Felix Magalela Mafa Sibanda utshele iStudio 7 ukuthi ukutshengisela ngokuthula abantu bebanengi yikho kodwa okungasusa uMongameli Emmerson Mnangagwa lebandla lakhe embusweni.
Isikhulumeli seMDC-T ekhokhelwa nguNkosazana Thokozani Khupe, uMnu Khaliphani Phugeni, yena uthe lanxa ibandla lakhe livuma ukuthi ngempela impilo isilukhulu, kabasoze bephatheke kuhlelo lolu ngenxa yomkhuhlane weCoronavirus.
Kodwa isiphathamandla sebandla leZanu PF uMnu Believe Gaule usole amabandla aphikisayo esithi azama ukugenqula uhulumende ngaphandle komthetho.