Inengi lithi likhathazekile kakhulu ngokukhwela mahlayana kwenani lasebebulewe yiCoronavirus lababanjwa lumkhuhlane kulezinsuku.
Inani lasebebulewe yilumkhuhlane likhwele ngabantu abahlanu ngoMgqibelo laya kumatshumi phose amabili, 18.
Ugatsha lwezempilakahle luthi izolo kulabantu abathathu abafunyanwe belomkhuhlane lo. Lokhu kukhuphule inani lasebebanjwe yiCoronavirus eZimbabwe laya phose kunkulungwane, 985.
Asebesindile labo sebekhwelile baya ku328 ngemva kokusila kwabayisitshiyangalombili izolo.
Ebantwini asebefile idolobho leHarare yilo elihamba phambili ngabayisitshiyangalombili lilandelwa ngelakoBulawayo ngabantu abayisikhombisa.
Phakathi kwabangamatshumi amane ababanjwe lumkhuhlane ngoMgqibelo, abalitshumi lantathu bekuyizisebenzi zezibhedlela njalo ezilitshumi zazo ngezesibhedlela seMpilo koBulawayo.
Isiphathamandla senhlanganiso yeBulawayo Progressive Residents Association uMnu Thembelani Dube utshele iStudio 7 ukuthi okudanisayo yikuthi abantu abanengi lokhe bengagqiki ama-mask.
Kusenjalo, uzulu uthi ukhathazekile njalo ngodaba lwabantu abaleCoronavirus ababaleka kuma-quarantine centers.
Iphephandaba leSunday News lithi ngoLwesihlanu kulabantu abalitshumi lane abalomkhuhlane lo ababaleke lapho ekade behlaliswe khona eBeitbridge. Abane babo batholakele babotshwa.
Amapholisa atshele njalo iphephandaba leli ukuthi elizweni lonke kulabantu abedlula amakhulu amabili, 225, asebebalekile kuma-quarantine centers.
Abangu 29 babo kuphela abatholakeleyo babotshwa. Isakhamuzi seGwanda uMnu Thandeko Zinti Mnkandla utshele iStudio 7 ukuthi ababalekayo laba bafaka uzulu jikelele engozini enkulu.