amalinks wokungena

Breaking News

Abathola Izikwelede Phansi Kohlelo Lokulima Kumele Bazibhadale, Kuhlokoma Uzulu


Inengi lithi abantu abathola izikwelede phansi kohlelo olwalujonge ukuphathisa abalimi ngo2007 kusiya ku2008 - inengi labo kungamalunga eZanu PF - kumele bazihlawule lanxa nje sezafakwa emahlombe kazulu nguhulumende.

Uzulu uqale ukuhlokoma ngaloludaba ngempelaviki ngemva kokuba kuvele ukuthi abantu abaphiwa okokulimisa okugoqela amathalakitha lokunye okungena kuzigidi lezigidi zamadola emelika phansi kohlelo lukahulumende olweFarm Mechanization Program, yiziphathamandla zeZanu PF labanye abasezikhundleni ezitshiyeneyo abalobudlelwano lalelibandla.

Igqwetha uMnu Alex Magaisa nguye owethule umbiko oveza amagama abantu laba lokuthi izinto abazikweledayo zazingezemalini umuntu ngamunye.

UMagaisa uthe izinto ezaphiwa abalimi phansi kwaloluhlelo zazilesisindo seUS$200 million.

Uthe njalo abathola izinto lezi bagoqela uMongameli Emmerson Emmerson Mnangagwa, yena obikwa waphiwa okokulimisa okwakungena kuUS$400,000.

Okucunule uzulu yikuthi abantu laba abasabhadalanga izikwelede lezi ngoba uhulumende wasuka wathi bengazihluphi. Lokhu kutsho ukuthi isikwelede lesi sasuka saba ngumthwalo kazulu wonke jikelele.

Lanxa owayengusibalukhulu webhanga elikhulu ngaleso sikhathi uMnu Gideon Gono, onguye owayekhokhela loluhlelo, esithi kwakulungile ukuthi uhulumende angabhadalisi abantu laba, uzulu uyakusola lokho esithi abantu ababhadala imithelo yibo asebesifa ngokuhlawula izikwelede lezi bona bevele bezidubekela.

UGono, eloba kumbiko odindwe yinkundla yeZimLive.com ngeSonto, uthe kulamalunga eMDC afana loNkosazana Thokozani Khupe, uMnu Welshman Ncube lomuyi uMnu Renson Gasela abathola labo usizo phansi kwaloluhlelo.

Asenelisanga ukukhuluma loNcube loMaKhupe.

Abanye abathola limali abafana lomeli weNorton edale lephalamende uMnu Temba Mliswa bathi kwakungelasidingo sokuthi bayibhadale limali ngoba kwakungumlandu kahulumende ukuphathisa abalimi.

Kodwa abanye njalo abayitholayo bayibhadala abafana loMnu Kudakwashe Bhasikiti, osowaxotshwa kubandla leZanu PF, bathi abangabhadalanga kumele bayihlawule limali.

Unobhala jikelele wenhlanganiso yeZCTU uMnu Japhat Moyo utshele iStudio 7 ukuthi ukwethesa uzulu isikwelede samalunga eZanu PF amalutshwana avele eyizinothi yinto embi.

please wait

No media source currently available

0:00 0:03:11 0:00

Lanxa abanye kuZanu PF besithi kwakulungile ukuthi uhulumende athathe isikwelede lesi kubhanga elikhulu lelizwe asifake emahlombe kazulu, iesinye siphathamandla salelibandla uMnu Believe Gaule uthi kavumelani lalokhu.

Ngakho, uthi kumele abalezikwelede laba bazibhadale.

please wait

No media source currently available

0:00 0:02:03 0:00

Amazwi kaGaule agcizelelwe yingcwethi kwezombusazwe uDr. Brilliant Mhlanga.

“Isenzo lesi yiso okuthiwa yikuba ngabaphangi, abahuquluzi, amasela. Kuveza sobala ukuthi iZanu PF ayimelanga uzulu, bazimele bona bodwa,” kutsho uDr. Mhlanga.

please wait

No media source currently available

0:00 0:04:01 0:00

XS
SM
MD
LG