Intathelizindaba elodumo uHopewell Chin’ono lomkhokheli webandla leTransform Zimbabwe uMnu Jacob Ngarivhume bazaphindela enkantolo njalo namuhla lapho abazakuzwa khona ukuthi umthethwandaba uyavuma na ukuthi bakhululwe ngemali yesibambiso, ibail.
Ababili laba babotshwe ngoMvulo bamiswa emthethwandaba kamantshi izolo besetheswa icala lokutshotshozela udlakela ngokukhuthaza uzulu ukuthi aphatheke kuhlelo lokutshengisela mhlaka 31 kulinyanga.
Igqwetha labo uMnu Doug Coltart uthi umthethwandaba uzakwethula isinqumo sawo ekuseni namuhla phezu kwesicelo sokuthi bakhululwe.
Umeya weHarare njalo elilunga lebandla leMDC Alliance uMnu Hebert Gomba laye ukhangelelwe ukumiswa enkantolo namuhla esetheswa amacala aphathelane lokuthengiswa kwendawo zokwakhela izindlu kulelidolobho ngaphandle komthetho.
Ukubotshwa kwakhe kulandela ukubotshwa njalo kwezinye iziphathamandla zekhansili yeHarare kumalanga edluleyo phezu kwamacala afanayo.
Kodwa umsekeli wesikhulumeli seMDC Alliance uMnu Felix Magalela Mafa Sibanda utshele iStudio 7 ukuthi akubajabulisi ukuthi uGomba ubotshwe wavalelwa esitokisini kodwa ilunga leZanu PF uMnu Obadiah Moyo, yena osanda kuxotsha esikhundleni sikamphathintabo wezempilakahle wabotshwa wangavalelwa.
