amalinks wokungena

Breaking News

Sebesedlula Inkulungwane Ezimbili Asebebanjwe iCoronavirus eZimbabwe


Osebenza eWilkins Hospital utshengisa amalunga edale lephalamende akwenza eWilkins Hospital lapho okuhlolwa abantu abalemikhuhlane enjenge coronavirus. (Photo: Mlondolozi Ndlovu)
Osebenza eWilkins Hospital utshengisa amalunga edale lephalamende akwenza eWilkins Hospital lapho okuhlolwa abantu abalemikhuhlane enjenge coronavirus. (Photo: Mlondolozi Ndlovu)

Inani labantu asebebanjwe iCoronavirus eZimbabwe likhwelile njalo izolo laya ku-2034 ngemva kokufunyanwa kwabantu abangamakhulu amabili aletshumi lanye, 214, belawo.

Ugatsha olubona ngezempilakahle luthi ikhulu elilamatshumi amabili lantathu babantu laba, 123, ngabavele kweleSouth Africa kuthi oyedwa uvele kweleZambia.

Abangamatshumi ayisitshiyagalolunye ngabathole lumkhuhlane phakathi eZimbabwe.

Kulabasindileyo njalo izolo abangamatshumi amabili lambili, okudale ukuthi inani lasebesilile kulumkhuhlane lalo likhwele liye kumakhulu amahlanu aletshumi, 510.

Asebefile bona bangamatshumi amabili lasithupha.

Ukukhwela kwenani lababanjwa lumkhuhlane labafayo kulezinsuku kubangele ukuthi uMongameli Emmerson Mnangagwa ethule iziqondiso ezintsha eziqinisa ukuvalwa kwelizwe eziqale ukusebenza izolo.

Phansi kweziqondiso lezi umuntu wonke kumele ahlale ngekhaya ngaphandle nxa esiyakukha amanzi lokuyathenga ukudla.

Izisebenzi ezenza imisebenzi ebalulekileyo efana leyezibhedlela yizo kuphela ezivunyelwa ukuya emsebenzini.

Akusela muntu njalo omele abonakale phandle kungatshaya ihola lesithupha ntambama kuze kuyetshaya ihola linye ekuseni.

Izolo emadolobheni wonke bekubetha umoya kulabantu abalutshwana abenza imisebenzi ebalulekileyo kuphela.

Amasotsha lamapholisa lawo ebegcwele ndawana yonke elondoloza iziqondiso lezi.

XS
SM
MD
LG