amalinks wokungena

Breaking News

Ezemaphandleni: Inengi Seliphila Ngokucela Ukudla Kubomakhelwane


Indlala eqhubeka ihlasela ngamandla elizweni kanye lokudula kwezinto sokubangela ukuthi abantu abanengi, ikakhulu emaphandleni, baphile ngokucela kubomakhelwane.

Izakhamizi ezixoxe leStudio 7 ezigabeni zeMatabeleland South ezigoqela ePlumtree, eKezi, eGwanda laseBeitbrige zithi sezidinga ukuphathiswa ngokudla ngokuphangisa ngoba zilakho ukubulawa yindlala lonyaka.

Igciwane leCoronavirus eselivalele uzulu emakhaya lalo selitshiye izakhamizi zingela lendlela zokuziphandela.

“Khonapha siyenza okokuthi ekuseni sipheke amajodo abantwana badle ntambama sesigoqoza okuzimputshana okukhona,” kutsho isakhamuzi seMatshiya, eMatshetsheni, uNkosikazi Aletta Ncube.

“Laba abahola kuSocila Welfare abalutshwana yibo abathi omunye engahola uhambe uyecela akuboleke igokoko uthi mhla uthe wazuza ukudla lawe umbisele igokoko lelana.”

Amazwi kaMaNcube agcizelelwe nguNkosikazi Maggie Moyo oyisakhamuzi seMawane yena othi uhulumende kumele engeze uncedo alupha izakhamizi.

“Ngabe bayaholisa umuntu wonke, hatshi ukukhetha… ungaba lomnyama uhola umumbu obolileyo ozawugayisa lawe udle lawe kunjalo ngenxa yendlala,” kutsho uMaMoyo.

Isakhamuzi sePlumtree, uNkosazana Nokuthula Nleya laye uthe ngapandle koncedo oluphuthumayo, abantu abanengi balakho ukubulawa yindlala lonyaka. Amazwi akhe asekelwe nguPrecious Nkala ohlala eKezi.

Inhlanganiso yeWorld Food Programme (WFP) ebisiza izakhamizi zemaphandleni ngokudla ithi idinga usizo lwemali eyizigidi zamadola angamakhulu amabili lamatshumi amahlanu, US$250 million, yokuthengela izizalwane zakuleli eziyizigidi ezine ukudla.

Kusenjalo, uzulu weMatabeleland seveze ukufuthelana okukhulu ngemva kokuba uMongameli Emmerson Mnangagwa echaze obengumphathintambo wezokulima uMnu Perrence Shiri njengeqhawe lamaqhawe emngcwabeni wakhe ngoLwesihlanu.

UShiri ubulawe ngumkhuhlane weCoronavirus njalo uphiwe inhlonipho yeqhawe lesizwe.

Inengi elifana loMnu Msizi Gumbo lithi uShiri ubengamelanga aphiwe linhlonipho ngoba ungomunye wabantu ababa lesandla kudaba lombhuqazwe weGukurahundi.

“Nguye uPerrence Shiri loMnagagwa loMugabe labanye babo abakuZanu PF ababulala abantu kakhulu eMidlands lemhlubulweni weMatabeleland ngesikhathi seGukurahundi,” kutsho uMnu Shiri.

Ocubungula ezombusazwe uMnu Bekezela Maduma Fuzwayo yena uthi ukufuthelana lokhu kuveza ukuthi ikhomishini yokukhumisana umlotha eyeNational Peace and Reconcilaiton Commision ayikenzi umsebenzi wayo.

“Kubuhlungu ukuthi uShiri labanye asebehambile sebefile badlula emhlabeni indaba yabo yeGukurahundi ingazange ihlalelwe phansi,” kutsho uMnu Fuzwayo.

please wait

No media source currently available

0:00 0:04:39 0:00

Facebook Forum

XS
SM
MD
LG