amalinks wokungena

Breaking News

'Kulusizi Ukuthi Ingqungquthela zeGukurahundi Ziyaphela Emhlabeni Udaba Lolu Lulokhu Lungakalungiswa'


Ukufa kowayengukhomanda we5th Brigade uMnu Perrence Shiri sokuveze sobala ukufuthelana okulokhu kukhona eMatabeleland laseMidlands phezu kokubulawayo mahlayana kwenkulungwane zabantu ngesikhathi sombuqazwe weGukurahundi.

Inengi lithi kulusizi ukuthi labo abetheswa umlandu wokubulala kumbe ukubulalisa abantu abazinkulungwane ezingamatshumi amabili, 20,000 baya bephela emhlabeni udaba lolu lulokhu lungakalungiswa.

Ababikwa baphatheka kulumbuqazwe asebadlula emhlabeni bagoqela uMnu Robert Mugabe, Enos Nkala, Solomon Mujuru loShiri, obulawe ngumkhuhlane weCovid-19 ngeviki edluleyo.

Abaphilayo bagoqela uMongameli Emmerson Mnangagwa ngokwakhe, umsekeli wakhe uMnu Constantico Chiwenga loMnu Sydney Sekeramayi.

Ocubungula ezombusazwe uMnu Brilliant Mhlanga uthi ithumba leGukurahundi belingabohla alubana abasolwa bethe bamiswa emthethwandaba.

“Nga kuba lomthethwandaba ukuze bonke laba abafana loShiri loMnangagwa ngitsho labafayo oGeneral Gunda, alubana bonke bebengaphiliswa babekhona emthethwandaba babhekane lamacala abo,” kutsho uMhlanga.

Enye njalo ingcwethi kwezombusazwe, uMnu Zenzele Ndebele, yena osowethule amafilimu amayelana ngalumbuqazwe uthi kaboni udaba lolu lusifa lwaya emthethwandaba ngoba abasolwa yibo ababusayo.

“Bazabusa baze beyokufa indaba le ingazange ithoniswe ngoba angikuboni ukuthi iZanu izaphuma esikhundleni eminyakeni emilutshwana elandelayo,” kutsho uNdebele.

“As long iZanu isesikhundleni, akulamuntu ozabe elesifiso sokuthi akhulume ngendaba yeGukurahundi leyi.”

Lanxa uMongameli Mnangagwa ethe ilizwe lilahlekelwe kakhulu ngokubhubha kukaShiri, abanengi eMidlands laseMatabeleland bebejabula enkundleni yeFacebook leTwitter besithi usehambile umbulali.

Owayengumphathintambo kuhulumende kaMugabe, uMnu Jonathan Moyo, yena owabulawelwa uyise yiGukurahundi uthe kulusizi ukuthi uMnu Shiri usehambile engamiswanga enkantolo wakhuluma iqiniso ngokwenzakalayo.

UMnu Shiri ubikwa wayesaziwa ngegama lokuthi Black Jesus ngesikhathi seGukurahundi ngoba wayesahlulela abantu esitsho ukuthi bayaphila na kumbe bayabulawa.

“UShiri njengoba sisazi ibizo lakhe elithiwa nguBlack Jesus ubengumuntu obelenhliziyo embi kakhulu,” kutsho olwela amalungelo oluntu uMnu Difa Dube.

Amazwi akhe agqizelelwe nguMhlanga yena othi njengoba uShiri esehambile, sengathi uyawafica amacala akhe emelele lapho aya khona.

UMugabe laye waze wazifela engazange axolise ngodaba lweGukurahundi ngaphandle nje kokuthi kwakuyisikhathi sokuhlanya.

Ngaphandle kokuxoliswa lokubotshwa kwalabo abaphatheka kulumbuqazwe, abanye bathi kunengi abafisa kwenziwe okufana lokuhlawulwa ukuze udaba lweGukurahundi lulungisiswe njalo kube lokukhumisana umlotha elizweni.

“Bakhona njalo abanye abafuna incwadi, omunye uyabe efuna nje i-death certificate ngoba obaba babo babulawa batshiya bengela ma-birth certificates. Sebelabantwana labo abangelamaphepha okuzalwa,” kutsho uNdebele.

Engena embusweni, uMongameli Mnangagwa wathembisa ukuthi iZimbabwe Peace and Reconciliation Commission izalulungisisa loludaba.

UMnangagwa useke wahlangana lenkokheli yezinye inhlanganiso eziphansi komanyano weMatabeleland Collective kanye lezinduna zeMatabeleland bekhulumisana ngaloludaba.

Umgcinisihlalo weZimbabwe Peace and Reconciliation Commission, uMnu Sello Nare utshele iphehandaba leNews Day ngenyanga edluleyo ukuthi izinduna lazo zifuna uMnangagwa axolise.

Ukufakazile laye ukuthi ezigabeni zeMatabeleland leMidlands lapho ikhomishini yakhe esihambe khona ukuyakhulumisana lozulu ngodaba lweGukurahundi lolu, kulokhu kulokufuthelana okukhulu.

Ilunga lezanu PF uMnu Believe Gaule laye ukuyavuma lokhu esithi ngempela udaba lweGukurahundi luyisilonda esilokhe sibhibhidla esimele selatshwe. Kodwa uthi uMnangagwa uzimisele ukululungisisa loludaba.

“Kulicebo elihle kakhulu ukuthi udaba lweGukurahundi lolu luphathwe kuhle. Usekutshilo uMongameli Mnangagwa ukuthi uyalulungisa,” kutsho uGaule.

Abanengi bathi ekudingeni isisombululo saloludaba, kumele kukhulunywe labantu abaphathwa kubi yilumbuqazwe abagoqela ababulawelwa izihlobo labangane, babe yibo abatshoyo ukuthi bafuna kwenziweni.

please wait

No media source currently available

0:00 0:06:45 0:00

Facebook Forum

XS
SM
MD
LG