amalinks wokungena

Breaking News

United Nations: Uhulumende kaMnangagwa Kumele Ahloniphe Amalungelo Kazulu


United Nations Secretary General Antonio Guterres speaks during a press briefing at United Nations Headquarters on February 4, 2020 in New York City. (Photo by Angela Weiss / AFP)

Umanyano weUnited Nations ngoLwesine usole kakhulu uhulumende kaMongameli Emmerson Mnangagwa usithi kumele atshiyane lokuhlukuluza uzulu.

Unobhala jikelele wolumanyano uMnu António Guterres wethule umbiko esithi ukhathazekile ngokwenzakalayo njalo wakhuthaza uhulumende ukuthi alondoloze amalungelo oluntu.

UGuterres ukhuthaze njalo abamabandla wonke ezombusazwe labenhlanganiso ezizimeleyo ukuthi balungisise okuhluphayo elizweni ngokuthula.

Inhlanganiso yeHuman Rights Watch (HRW) layo yethule umbiko ichothoza uhulumende ngokuthumba lokuhlukuluza abantu abafana losakhulayo uTawanda Muchehiwa, yena owathunjwa ngeviki edluleyo watholakala etshayiwe walimala kakubi.

UMuchehiwa ubikwa elokhu elaliswe esibhedlela. Igqwetha lakhe lithi izinso zakhe azisasebenzi kuhle ngemva kokutshaywa ngabantu abanakanelwa ukuthi ngamaCIO, amasotsha kumbe amapholisa.

Inhlanganiso yeHRW isole njalo ukuhlukuluzwa kwentathelizindaba ezifana lomhleli wenkundla yeZimLive uMnu Mduduzi Mathuthu, uHopewell Chin’ono, yena olokhe evalelwe ngemva kokuncitshwa ithuba lokukhululwa nge-bail ngoLwesine kanye loMnu Jacob Ngarivhume, yena ozakuzwa kusasa ukuthi uyavunyelwa na kumbe uyalelwa ukukhululwa laye nge-bail.

Isikhulumeli sikahulumende uMnu Nick Mangwana yena wethule umbiko ekulandula ukuthi uhulumende weZanu PF wephula amalugelo oluntu.

Khepha ibandla leMDC Alliance lithi okulempondo akufihlwa emgodleni.

“Kuyinto embi kakhulu yoneyo enziwa nguhulumende kaMnangagwa encedisanaa lebutho, kuyajabulisa ukuthi amanye amazwe ayakunanzelela lokho. Kodwa esikufisayo yikuthi angenele ancedise, kungabi ngamazwi kuphela,” kutsho ilunga leMDC Alliance uMnu Edwin Ndlovu.

Kodwa ilunga leZanu PF uMnu Mabutho Moyo utshele iStudio 7 ukuthi uhulumende uzama ukuvimba ukugenqulwa kwakhe ngamabandla aphikisayo esebenza leMelika.

“Ilizwe lelizwe lilemithetho yalo, nxa usephula umthetho ubuthanisa abantu ubakhuthaza ukuthi bayekhipha uhulumende uyabotshwa vele,” kutsho uMnu Moyo.

please wait

No media source currently available

0:00 0:05:31 0:00

Facebook Forum

XS
SM
MD
LG