Lanxa uMongameli Emmerson Mnangagwa esithi konke kuhamba kahle eZimbabwe njalo akula kwephulwa kwamalungelo oluntu okukhona, ibandla elibusayo kweleSouth Africa eleANC seligcizelele ukuthi umumo awukho muhle njalo kumele kudingwe isisombululo.
Obona ngobudlelwano beANC lamanye amazwe uNkosazana Lindiwe Zulu utshele umsakazo we-eANC izolo ukuthi ngombono webandla lakhe, iqiniso ngeZimbabwe ngelokuthi izinto azimanga kuhle ngenxa yezombusazwe ezimele zilungiswe.
Uthe lokhu kuvezwa sobala ngabantu abafundileyo ababaleka eZimbabwe besiyakwenza imisebenzi engelasithunzi kweleSouth Africa.
UNkosazana Zulu uthe ukuze udaba lolu lulungiswe, kumele uhulumende kaMnangagwa atshelwe iqiniso.
UNkosazana Zulu wayekuqula likaMnu Thabo Mbeki ngesikhathi enguMongameli elaletha ukukhulumisana phakathi kukaMnu Robert Mugabe loMnu Morgan Tsvangirai ngo2008.
Inkulumo lezi zakhokhelela ekubunjweni kohulumende wenkazatho phakathi kweZanu PF leMDC.
Amazwi kaNkosazana Zulu aza ngemva kokuba uMongameli Mnangagwa lebandla lakhe leZanu PF bevimbe iqula likaMongameli Cyril Ramaphosa ngoMvulo ukuhlangana labamabandla aphikisayo besithi akulakwephulwa kwelungelo oluntu okwenzakalayo.
Unobhala jikelele weANC uMnu Ace Magatshule ngeviki edluleyo yena uthe eleSouth Africa likhathazekile ngokwenzakalayo eZimbabwe.
Amazwi akhe ahlangabezwa ngolaka olukhulu yisikhulumeli seZanu PF uMnu Patrick Chinamasa.
Umanyano weAfrican Union lawo wethule imbiko kuliviki ukhuthaza uMnangagwa ukuthi ahloniphe amalungelo kazulu.
Isiphathamandla senhlanganiso elwela amalungelo eyeIbhetshu likaZulu uMnu Mbuso Fuzwayo utshele iStudio 7 ukuthi amazwi eziphathamandla zeANC aveza sobala ukuthi eleSouth Africa liphatheke kubi ngodaba lweZimbabwe.
