amalinks wokungena

Breaking News

Ziyavulwa Izikolo Zemaphandleni Kulodubo Lokusilela Kwamanzi


Isikolo se Kafusi.

Inengi labazali besigaba sezansi yeMandebeleni likhathazekile ngokuswelakala kwamanzi esigabeni okulakho ukudala ukukumemetheka kwegciwane leCorona Virus ngesikhathi abafundi bekhangelelwe ukubuyela esikolo kumaviki amabili alandelayo.

Izikolo ezinengi zemaphandleni esabelweni seMatabeleland South kazilazikotsho okudala ukuthi abafundi behambe immango emide ukuyadinga amanzi kumbe babuye bewathwele besuka emakhaya.

Lokhu sekudale ukuthi abazali bakhathazeke ngokuvulwa kwezikolo ngalesisikhathi sokumemetheka kwegciwane leCoronavirus.

UNkosazana Getrude Mhlanga oweGohole kuWard 3 eMatobo uthi akula okubonakalayo osekwenziwe ezikolo selokhu kuqhamuke leligciwane.

"Okwamanje ezinye izikolo lokhu zisebenzisa amanzi athathwa ezikotsho, izikotsho ezihlanganela lezakhamizi, ezinye lokhu kunjalo kungela manzi njalo ngibona izikolo vele ezilamanzi ikakhulu ngapha emakhaya ziyigxenye yazo, angazi ukuthi ngezixwayiso zeCovid izikolo zingabe sezilungele ukuvula," kusho uMhlnga.

Amazwi akhe agcizelelwe nguNkosikazi Thando Mauba oweMatanamombe kuTuli eGwanda South.

"Izikoilo zakulesisigaba sakithi kulobunzima kangiboni ukuthi sezilungele ukuthi zingavulwa ngoba zonke lezizikolo engikwaziyo ezikutholileyo ngamabhakede abaphiwe yiWorld Vision," kutsho uMauba.

Abafundi abazithweleyo bazavunyelwa ukubuyela esikolo ngemva kokubunjwa komthetho omutsha ovimbela abezikolo ukuthi babaxotshe.

UNkosikazi Siphathisiwe Nkala oweSilikwe eGwanda North uthi abezikolo kuzafanela njalo balungiselele ukwamukela lababantwana abakhulelweyo.

"Kuqakathekile ukuthi bathole ikusasa labo elifaneleyo njalo bathole njalo bathole ukuxwayiswa bengakabuyeli esikolo njalo kulandelwe zonke izinqumo ze COVID 19."

UNkosikazi Julieth Nkiwane ngumqondisi wenhlanganiso elwela amalungelo abomama lamantombazana eyeWomen Development Association of Zimbabwe WODAZ, uthi bayalamukela inyathelo elithethwe nguhulumende lokuthi amantombazana azithweleyo aqhubeke ngemfundo kodwa kunengi okusamele kwenziwe.

"Okukhona yikuthi abantu bafundiswe kabanzi , sifundise oSobhuku , sifundise abababalisi sifundise labazali siphinde sifundise labo abantwana ukuthi umntwana uzithwele kasocala likabani, akumelanga kube lomuntu omehlukanisa ngokuthi uyisigoga, ngokuthi ulimele, ngokuthi uzithwele , umntwana uzithwele kahambe esikolo," kutsho uNkiwane.

Laye uthi akula uhulumende asekwenzile ezikolo zemaphandleni ukuze abafundi bavikeleke kugciwane leCoronavirus.

"UHulumende uke watsho ukuthi izikolo zonke selungisile ukuthi kube lemigodi kumbe lamanzi agijimayo amatanka lokunye asikakuboni ezikolo isikhathi sokuvulwa sesiseduze esikwesabelayo angiboni uhulumende elayo amandla kumbe ezenelisa," kutsho uNkiwane.

UNobhala jikelele wenhlanganiso yababalisa eyeZimbabwe Teacher's Association - ZIMTA uMnu Tapson Nganunu Sibanda uthi bazamile ukumbonisa uhulumende ngodaba lokuvulwa kwezikolo kodwa nguntando kayiphikiswa.

"Sisengozini yokuthi ekunyatheleni kwethu ezikolo umkhuhlane lo uzamemetheka ngeyinye indlela emangalisayo ngoba sisilela kuzo zonke izinto ezidingakalayo, aluba uhulumende wayehambisa njengokucebisa kwethu bekumele lezizikolo zivulwe phose ngomnyaka ozayo, simazisile uhulumende ngombono lo , uhulumende kwesinye isikhathi kathathi imbono e vela kwabanye imbono eqondileyo kuye ngevela kuye kuphela," kutsho uSibanda.

Obona ngokukhitshwa kwembiko kugatsha lwezemfundo yaphansi uMnu Taungana Ndoro uthi iyasilela imali yokugebha izikotsho kuzikolo zonke zemaphandleni.

"Kulokubambisana kungatsha zikahulumende ukuze izikolo ezingelamanzi ziwathole, ugatsha olubona ngentuthuko yezabelo soluthembise ukuthi imali enengi eyabelwa izabelo izasetshenziswa ukugebha izikotsho ukuze zonke izikolo zithole aanzie kuvikelwe umkhuhlane weCovid.Lathi njengogatsha lwezemfundo yaphansi silesifiso sokugebha izikotsho ezingu - 729 nxa singathola imali, okwamanje sile $30 million eyenekla ukugebha izikotsho ezilikhulu," kutsho uNdoro.

Inani labantu abahlaselwe yigciwane leCoronavirus eZansi yemaNdebeleni liya liqonga mihla ngemihla.

Umbiko okhitshwe lugatsha lwezempilakahle ukhomba ukuthi sebengamakhulu ayisikhombisa lamatshumi amahlanu lasithupha - 756 asebetholakale belegciwane leCoronavirus kulesisabelo labulala abayisikhombisa.

please wait

No media source currently available

0:00 0:04:15 0:00


Facebook Forum

XS
SM
MD
LG