Kubhubhe abantu abangamatshumi amabili, 20, ngeCovid-19 eZimbabwe ngoLwesibili njalo kwatholakala abangamakhulu amabili alamatshumi ayisithupha lasithupha, 266, belomkhuhlane lo.
Lokhu kukhweze inani lasebebanjwe lumkhuhlane laya kunkulungwane ezedlula amatshumi amathathu, 33,814.
Inani lasebebulewe yiCoronavirus lona likhwele laya kunkulungwane elamakhulu amabili alamatshumi amahlanu lane 1,254.
EleChina lazise izolo ukuthi lizaphathisa eleZimbabwe ngejekiseni yokuvikela lumkhuhlane.
Uhulumende uthi uphakathi kokuthenga amajekiseni afanayo kumankampani ewalungisayo.
Kodwa kulabanye abathi abasoze bahlatshwe amajekiseni la ngezizatho ezitshiyeneyo ezigoqela inkolo zabo lokucabangela ukuthi imithi le ilakho ukudala umonakalo emizimbeni yabo.
Bakhona abathi njengoba imithe le ilungiswe ngesiphangiphangi, kungenzakala ibalethele imikhuhlane engaziwamuntu ngemva kweminyaka.
Omunye wabantu laba nguMnu Max Mnkandla yena othi kuyasolisa ukuthi imikhuhlane esileminyaka iqeda abantu efana lowengculaza ayikatholelwa imithi yokuyelapha kodwa oweCovid-19 usutholakele ngemva kwenyanga nje ezimbalwa.
Ingcwethi kwezempilakahle zona zithi amajekiseni la alungile njalo akulabufakazi bokuthi kulobubi angabudala ebantwini.
Facebook Forum