Ikhansili yedolobho lakoBulawayo ithi isiyengezelele amahola abahlali balelidolobho abazathola ngawo amanzi esuka kwangamatshumi ayisikhombisa lambili-72 esiya kwalikhulu lamatshumi amane lane 144 ngeviki ngoba sokungene amanye amanzi emadamu.
Lokhu kutsho ukuthi abantu sebengathola amanzi okwamalanga amane ngeviki.
Kodwa ezinye izakhamizi zeNkulumane 12 eMabhizeni, le Phumula South eHabek, zithi bezivele zingawatholi ngemfanelo amanzi kulandelwa uhlelo obelukhona.
Inhlanganiso elwela ilungelo loluntu eyeMatabeleland Institute for Human Rights, elogatsha lwe Bulawayo Water Action Group, elenhlelo ezitshiyeneyo ngeMvulo yonke, ezokukhankasela ukuthi kube lamanzi kulelidolobho, ithi seyalobela ugatsha lukahulumende olubona ngenhlelo zamanzi olwe Zimbabwe National Water Authority ibuzisisa ngodaba lwamadamu angagcwaliyo lanxa izulu lisina okungelamkhawulo, njalo yahlangana lekhansili yakoBulawayo ukuhluza loludaba.
USithandekile Mhlanga weStudio 7 uxoxe lomqondisi walinhlanganiso uMnu. Khumbulani Maphosa ukuze sizwe imbono yakhe ngaloludaba.