Lanxa izakhamizi zemaphandleni zisemkela ukuvulwa kwezikolo zithi zibhekane lodubo lwemali kungakho kuzakubanzima ukuthi zihambise abantwana ezikolo.Abazali bathi ukuvalwa kwelizwe phansi kwemigoqo yokwenqabela ukumemetheka kwegcikwane lecoronavirus kubangele ukuthi balahlekelwe yinzuzo.
Inengi labazali lithi inyathelo elithethwe nguhulumende lokuvula izikolo lihle kakhulu ngoba abanye labantwana emakhaya besebephenduke baba ngamahlongandlebe.
Kodwa abazali bathi imali yokubhadalela indleko zesikolo kabalayo ngoba bebehlezi emakhaya bengenzi lutho ngenxa yokuvalwa kwelizwe okweLockdown ukuze kuvikelwe ukumemetheka kwegciwane leCoronavirus.
Lanxa izikolo zizavulwa mhla zilitshumi lanhlanu kulinyanga kayisibo bonke abafundi abazabuyela ezikolo. Isakhamuzi seGaranyemba uMnu George Ncube uthi owakhe umntwana umbikele ukuthi ngeke asalugxoba esikolo.
UNkosikazi Eunice Nyathi ophila ngokuthengisa izilimo uthi ibhizimusi lakhe belingahambi kahle selokhu umnyaka uqalile ngenxa kokuvalwa kwelizwe njalo kuzakubanzima ukuthi alungiselele ukuvulwa kwezikolo.
Amazwi la asekelwe ngomunye umzali uMnu. Richard Ngwenya oyisakhamuzi seNkulangugwe othi abafundi akumelanga babiselwe emakhaya lanxa abazali bengehluleka ukubhadala ezikolo.
UMnu. Mathew Sibanda uthi sebeqalile ukulungisa izambuzi esikolo seGaranyemba Primary ukuze abafundi bathole konke kulungile lapho izikolo zivulwa.
USobhuku weGaranyemba uMnu Mkhube Ndlovu uthi kuhle ukuthi izikolo zivulwe kodwa uthi kumele kulandelwe iziqondiso zokuvikela ukumemetheka kwegciwane leCoronavirus.
Abafundi abazabhala imihloliso ekupheleni kwalonyaka bazavulwa kuqala izikolo mhla zilitshumi lanhlanu kulinyanga kuthi abanye bonke balandele ngemva kweviki.
Obona ngokukhitshwa kwembiko kugatsha lwezemfundo uMnu Taungana Ndoro ubike ukuthi inengi lezikolo kuleli selilungele ukuvulwa kulandelwa iziqondiso zokuvikela ukumemetheka kwegciwane leCoronavirus.
